Innlent

Hjólar hringinn og safnar fyrir einhverfa

Lillý Valgerður Pétursdóttir skrifar
Ungur maður mun næsta hálfa mánuðinn hjóla í kringum landið til styrktar unglingahópum Einhverfusamtakanna. Nokkur spenna var fyrir ferðinni þegar hann lagði af stað í morgun.



Tryggvi Þór Skarphéðinsson, sem er 24 ára, hélt af stað frá Reykjavík í morgun í hringferð sína um landið. Hann ætlar að hjóla einn í kringum landið á 15 dögum. Ferðin er farin til styrktar Einhverfusamtökunum. „Mig er búið að langa að gera þetta rosalega lengi,“ segir Tryggvi og að tíminn hafi verið réttur til þess í sumar. Hann ákvað að safna fyrir Einhverfusamtökin þar sem bróðir hans, sem er 3 árum yngri en hann, er einhverfur og segir hann málefnið gott.



Sigrún Birgisdóttir, framkvæmdastjóri Einhverfusamtakanna, segir unglingahópa samtakanna sem Tryggi ætlar að safna fyrir vinna mikilvægt starf. „Við erum með tvo starfandi unglingahópa. Einn á Akureyri og einn hérna í Reykjavík. Þessi hópar þeir hittast hálfs mánaðarlega og þeir spila, spjalla, fara út að borða eða í bíó eða gera eitthvað skemmtilegt saman. Það er fagfólk sem að mætir alltaf með þeim og styður þau í þessu starfi. Þetta eru unglingar 12-20 sem að eiga kannski mjög fáa félaga og hafa orðið fyrir einelti og þurfa virkilega stuðning félagslega. Þannig að þetta er mjög mikilvægt starf. Það eru á bilinu kannski 15-20 unglingar að mæta í hvert einasta skipti þannig að þetta er vel sótt,“ segir Sigrún.



Hægt er að senda  SMS  í númerið 1900 með skilaboðunum „einhverfa“ til að styrkja málefnið en við hvert  SMS  þá renna 1.900 krónur til samtakanna. Tryggvi var nokkuð spenntur fyrir ferðinni áður en hann lagði í hann í morgun en hann segir að huga þurfi að mörgu fyrir svona ferð. „Það eru mjög mikið af hlutum svona bara líkamlega geta og matur og allt það sko. Rigning eða rok eða verður gott veður þú veist. Ég veit ekkert hvað mun gerast þannig að þetta verður mjög áhugavert,“ segir Tryggvi Þór.

Mest lesið


Fleiri fréttir

Sjá meira


×

Mest lesið