Dauðans alvara að ræða ekki tilfinningar

Vilhjálmur Birgisson verkalýðsforingi á Akranesi missti son sinn fyrir rúmu ári síðan. Hann er þakklátur vitundarvakningu um sjálfsvíg ungra karla, Útmeða og hvetur fjölskyldur til að nota tækifærið til að setjast niður og ræða saman.

„Það er mjög mikilvægt að fjölskyldur tali saman. Oft er það þannig að þegar fólk hefur gengið í gegnum svona erfiðleika og svona mikla sorg sem fylgir því að missa nákominn, þá sest fólk niður og fer yfir hlutina, er svona að velta hlutunum fyrir sér. Ég held að fólk eigi að gera það áður en svona hlutir eiga sér stað. Til að opna á tilfinningar fólks og athuga hvað veldur því að fólki líður illa.“

Hrannar Jónsson formaður Geðhjálpar sagði í fréttum stöðvar 2 í gærkvöldi að þörf væri á tilfinningabyltingu meðal karla. Vilhjálmur tekur undir þau orð.

„Svo sannarlega þarf þess. Þetta er dauðans alvara, við erum að missa upp undir fjörutíu manns vegna sjálfsvíga og stór hluti þeirra eru ungir karlmenn, ég held það segi meira en mörg orð hvað það varðar. Karlmenn þurfa að gjöra svo vel að leggja tilfinningar sínar á borð fyrir fagfólk þegar þess ber undir.“

Vilhjálmur minnir unga karlmenn á að það sé ekkert vandamál svo stórt að það megi ekki fá hjálp.

„Ég er með þau skilaboð að það er ekkert vandamál það stórt í þessum heimi að ekki sé hægt að fá hjálp . Það er dauðans alvara að leita sér ekki hjálpar þegar fólki líður illa. Ég held að hvert einasta mannsbarn hafi lent í því að líða illa. En að sogast ofan í myrkur þunglyndis og kvíða og annað slíkt er dauðans alvara. Þannig að ég hvet alla sem eru í slíku hugarástandi að leita sér hjálpar fyrr en seinna.“

Hann biðlar til landsmanna að styðja við landssöfnun sem hefst snemma í næstu viku,.

„Það veit enginn hjá hvaða fjölskyldu þessi vágestur bankar upp á næst. Það er einfaldlega þannig, maður átti ekki von á því sjálfur að lenda í slíku. Ég bið allar fjölskyldur að huga vel að hverju öðru og ef einhverjum líður illa að leggja hönd á plóg við að koma viðkomandi undir þær læknishendur sem til þarf. Að lokum þá hvet ég alla til að styðja þetta frábæra framtak hjá þessum tólf manna hlaupahópi sem leggur á sig þrekvirki við að hlaupa hringinn í kringum landið. Góðu málefni til heilla.“