Spilar Birkir í Serie A á næstu leiktíð?

Haft er eftir Stefano Salvini, umboðsmanni Birkis Bjarnasonar, að Birkir stefni á að spila í A-deildinni á Ítalíu á næstu leiktíð.

Birkir leikur með Pescara í B-deildinni sem stendur en liðinu mistókst að tryggja sér sæti í efstu deild eftir einvígi við Bologna um laust sæti.

Samningur Birkis við Pescara rennur út um næstu mánaðarmót og hefur Birkir m.a. verið orðaður við Leeds United á Englandi. Salvini segir þó að Empoli og Palermo séu meðal þeirra liða sem sýnt hafi Birki áhuga.

"Eftir að hafa farið niður um deild þá sýndi hann [Birkir] gæði sín og hann er tilbúinn til að spila í Seria A," er haft eftir Salvini en Birkir lék með Sampdoria í efstu deild tímabilið 2013-2014.