Björn og maður hræða líftóruna hvor úr öðrum

Þegar myndatökumenn CBS í Bandaríkjunum voru að taka upp myndefni fyrir frétt um áhrif þurrka í Kaliforníu á dýralífið náðu þeir einstaklega góðu myndskeiði. Þar var björn að ganga að horni húss, en á nákvæmlega sama tíma gekk eigandi hússins fyrir hornið.

Báðir virðast ekki vita af hvorum öðrum, en eigandi hússins er með kaffibolla í hendi. Björninn og maðurinn virðast hafa nánast hrætt líftóruna úr hvorum öðrum, því báðir hoppuðu þeir upp í loftið þegar þeir mættustu og hlupu í sitthvora áttina.

Mikill fjöldi dýra í Kaliforníu í Bandaríkjunum hefur sótt inn á byggð svæði vegna mikilla þurrka. Birnir leita sér að fæðu í ruslafötum og görðum. Þá elti hópur sléttuhunda mann sem fór út að ganga með hund sinn.

Kvörtunum íbúa Kaliforníu vegna bjarna hefur fjölgað gífurlega á síðustu árum samkvæmt CBS.

Alla frétt CBS um ágang dýra í Kaliforníu má sjá hér.