Hreinsunarátak á Hornströndum þann 23. maí

Gert verður hreinsunarátak á Hornströndum laugardaginn 23. maí. Farið var í sambærilega ferð í fyrra og þótti takast sérstaklega vel til og því var ákveðið að endurtaka leikinn.

Í tilkynningu frá Ísafjarðarbæ segir að aragrúi af plastrusli sem lent hafi í sjónum endi á þessum slóðum og því sé talsvert verk að vinna. „Í fyrra var hreinsað í Hlöðuvík og Kjaransvík, en að þessu sinni verður farið fyrir Horn og hreinsað í Látravík við Hornbjargsvita og eins langt suður eftir og mannskapur og tími leyfa (Hrollaugsvík, Smiðjuvík, Barðsvík, Bolungarvík).“

Áætlað er að leggja snemma af stað til að nýta daginn vel. Segir að siglt verði frá Ísafirði og tekur hver sjálfboðaliði með nesti yfir daginn en fær veglegt grill á þessum fallega stað áður en lagt verður af stað aftur heim.

„Gjöldum til baka það sem landið hefur gefið okkur og fögnum 40 ára afmæli Hornstrandafriðlands með því að taka þátt í að hreinsa þennan afskekkta og fallega stað.“

Áhugasamir eru beðnir um að hafa samband sem fyrst á netfangið postur@isafjordur.is eða í síma 450-8038 og skrá sig í ferðina, en takmarkað sætaframboð er í bátunum.