Hvetjum alla til að kjósa

Liðnar vikur hafa verið skemmtilegur tími í Háskóla Íslands. Í tengslum við kjör á nýjum rektor hefur farið fram áhugaverð og uppbyggjandi umræða um það hvernig við viljum sjá þessa mikilvægu menntastofnun þróast á komandi árum. Þrátt fyrir vísbendingar um að starfsfólk skólans sé orðið langþreytt á niðurskurði og óhóflegu vinnuálagi hefur tekist að skapa kröftuga umræðu um áhersluatriði og stefnumál. Rætt hefur verið um nýjar kennsluaðferðir sem samræmast betur breyttu samfélagi og mikilvægi þess að styrkja samband kennara og nemenda. Áhersla hefur verið lögð á að bæta aðstæður starfsmanna skólans, m.a. þess stóra hóps sem sinnir stundakennslu og kallað er eftir nýliðun í röðum kennara með fjölgun kennarastarfa. Jafnframt hefur verið rætt um leiðir til að bæta aðstæður til rannsókna með uppbyggingu innviða skólans.

Á mánudaginn veljum við milli tveggja vel hæfra frambjóðenda, þeirra Guðrúnar Nordal og Jóns Atla Benediktssonar. Við sem skrifum þessa grein höfum þekkt Guðrúnu mislengi en líkt og svo margir aðrir höfum við hrifist af forystuhæfileikum hennar og útgeislun í þessari kosningabaráttu. Guðrún hefur einstaka hæfileika til að ná til fólks og fá það með sér. Hún hefur leitt Stofnun Árna Magnússonar í íslenskum fræðum af einstökum skörungsskap. Mörgum er í fersku minni glæsilegt afmælisár Árna Magnússonar árið 2013, en í tengslum við það áttu starfsmenn stofnunarinnar samstarf bæði við fræðimenn í HÍ og ýmsa sem hafa skarað á einhvern hátt fram úr í íslensku samfélagi til að vekja athygli á Árna og handritunum. Einnig viljum við benda á að ásamt félögum sínum í vísinda- og tækniráði tókst Guðrúnu að sannfæra stjórnvöld um mikilvægi þess að auka fjárveitingar til vísindarannsókna á Íslandi verulega.

Guðrún á að baki langan feril sem vísindamaður, hefur birt fjölmargar ritrýndar greinar og bækur hjá alþjóðlegum forlögum á fræðasviði sínu. Hún nýtur almennrar virðingar og viðurkenningar bæði hér heima og erlendis og hefur hún m.a. leitt stórt alþjóðlegt rannsóknaverkefni á sviði norrænna fornbókmennta. Hún hefur tekið þátt í margs konar alþjóðlegu rannsóknasamstarfi og hlotið alþjóðlegar viðurkenningar fyrir vísindastörf sín.

Niðurstaða okkar er sú að Guðrún muni reynast einstaklega hæfur rektor. Hún hefur víðtæka stjórnunarreynslu, er vandaður vísindamaður og hefur sýnt að hún fær fólk með sér í krefjandi verkefni. Hún leggur áherslu á opna og lýðræðislega umræðu og undir hennar stjórn teljum við að Háskóli Íslands geti vaxið og aðlagast kröfum framtíðarinnar.