Mikil leit stendur yfir að breskum stúlkum í Tyrklandi

Þrjár stúlkur, tvær fimmtán ára og ein sextán, sem voru saman í skóla í London hafa flogið til Tyrklands með það markmið að komast til Sýrlands og ganga til liðs við Íslamska ríkið. Breskir lögreglumenn hafa farið til Tyrklands á eftir þeim og er þeirra leitað þar, en mögulega eru þær þegar komnar til Sýrlands.

Þær flugu til Tyrklands þann 17. febrúar.

Yfirvöld í Bretlandi hafa orðið fyrir gagnrýni vegna málsins. Ein stúlknanna hafði samband við konu á Twitter, áður en þær fóru til Tyrklands. Sú kona fór til Sýrlands árið 2013 til að giftast vígamanni ISIS og hefur hún og Twittersíða hennar verið undir eftirliti síðan.

Á vef BBC segir að fjölskyldur stúlknanna hafi beðið þær um að koma heim sem fyrst. Systir einnar þeirra vonar að þær hafi farið til Sýrlands til að ná í vinkonu sína úr skólanum, sem fór þangað í desember.

Skólastjóri Bethnal Green skólans, þar sem stúlkurnar voru nemendur, segir að lögreglan hafi rætt við þær í desember þegar vinkona þeirra fór til Sýrlands. Þá vaknaði ekki grunur um að þær hefðu einnig í huga að fara einnig og ganga til liðs við Íslamska ríkið.