Erfiðir átta mánuðir borgarfulltrúa: Tóku ákvörðunina varðandi Gústaf sjálfar

Guðfinna Jóhanna Guðmundsdóttir, borgarfulltrúi Framsóknarflokksins, segir að þær Sveinbjörg Birna Sveinbjörnsdóttir hafi verið búnar að taka ákvörðun um að draga skipan Gústafs Níelssonar sem varamann í Mannréttindaráð Reykjavíkurborgar til baka áður en forystumenn Framsóknarflokksins sögðu þeim að gera það. Rangt sé að þær Sveinbjörg hafi verið „teknar á teppið“ af Sigmundi Davíð Gunnlaugssyni formanni flokksins.

Skipan Gústafs vakti mikla athygli en fyrstu tíðindi þess birtust á Vísi að kvöldi 20. janúar. Skipun Gústafs vakti sérstaka athygli í ljósi þess að hann er yfirlýstur og flokksbundinn Sjálfstæðismaður auk þess sem hann hefur verið gagnrýndur fyrir ummæli sín um múslima og samkynhneigða.

Guðfinna Jóhanna sagði í viðtali við Vísi þá um kvöldið að alls konar raddir ættu að heyrast í mannréttindaráði.

„Gústaf hefur verið virkur í þjóðfélagsumræðunni síðustu árin. Á grundvelli yfirlýsinga í samstarfssáttmála meirihlutans um að hlustað sé á allskonar raddir og þeim skapaður vettvangur þá er það mat borgarfulltrúa Framsóknar og flugvallarvina að skipan hans sem varamanns styðji við þau sjónarmið,“ sagði Guðfinna. Um hádegisbil daginn eftir sendu borgarfulltrúarnir frá sér yfirlýsingu þar sem skipan Gústafs var dregin til baka.

Sjá einnig:„Ég var ekkert sérstaklega drukkin“

Guðfinna sagði í viðtali í Eyjunni á Stöð 2 í gær að ákvörðunin hefði verið alfarið tekin af þeim Sveinbjörgu. Hún hafi vissulega fundað með forsætisráðherra klukkan hálf tólf umræddan dag en þá hafi þær Sveinbjörg þegar verið búnar að ákveða að draga skipan Gústafs til baka.

„Við tókum þessa ákvörðun áður en nokkur í forystu Framsóknarflokksins var búinn að segja okkur að taka þessa ákvörðun. Við áttuðum okkur á að þetta voru mistök og drógum til baka.“

Guðfinna ræddi einnig erfiða átta mánuði síðan kollegi hennar, Sveinbjörg Birna, sagði í viðtali á Vísi að það væri hennar skoðun að afturkalla ætti lóð til múslima í Mörkinni í Reykjavík.

„Ég hef ekkert á móti því að byggð sé moska í Reykjavík,“ sagði Guðfinna í gær en ítrekaði að staðsetningin væri ekki heppileg að hennar mati.

Undanfarnir átta mánuðir hafi verið harðir og ekki síst eftir ummæli Jóhannesar Bjarnasonar, fyrrum oddvita flokksins á Akureyri, fyrir helgi.

„Forysta Framsóknarflokksins þarf hins vegar að sprengja þetta graftarkýli og þurrka gröftinn af,“ sagði Jóhannes meðal annars.

Post by Jóhannes Gunnar Bjarnason.

Guðfinna skrifaði í kjölfarið færslu á Facebook þar sem hún sagði að eftir allt sem á undan væri gengið ætlaði hún að leyfa sér að gráta.

„Eftir 8 mánaða opinbert einelti þar sem fjölmiðlar skapa vettvang til að láta fólk sparka í mig, svívirða og ljúga upp á mig skoðanir og búa til einhverja allt aðra manneskju úr mér en èg er ætla ég að leyfa mér að gráta, En fyrir hverja er þetta svo? Einstaklinga sem þurfa útrás fyrir eigin gremju og minnimàttarkennd til að upphefja sig og einstaklinga í einhverjum pólitîskum leik, hvort sem það eru pólitískir andstæðingar eða fólk í sama flokki sem er að berjast um völd eða er à leið úr flokknum og vantar sínar 15 mínútur af frægð. Versta við eineltið er að sitja hjá og leyfa því að gerast,“ sagði í færslu Guðfinnu.

Post by Guðfinna Jóh. Guðmundsdóttir.

Hún bætti við í Eyjunni í gær að síðustu átta mánuðir hefði verið svolítið harðir.

„Þeir hafa farið í að neita hlutum sem ég hef aldrei nokkurn tímann sagt. Búið að búa til skoðanir. Svolítið Nixon aðferðin, „Let them deny it“,“ sagði Guðfinna í Eyjunni.

Engin umræða sé um það sem Framsókn og flugvallarvinir séu að gera í borginni. Ekki virðist eiga að leyfa þeim hlutum að koma upp á yfirborðið.