Ógnin við börn í grunnskólum Reykjavíkur

Varðandi reglur sem virðast vera strangari í Reykjavík en í nágrannasveitarfélögum þá hef ég miklar áhyggjur af því sem foreldri að verið sé að þverbrjóta þær oftar en við gerum okkur grein fyrir og ég hræðist það að börnin mín verði notuð sem hluti af auglýsingaherferð stórfyrirtækja.

Ég vona að skólar beri þess gæfu að passa betur upp á eftirfarandi þætti auk merktra hjálma og tannbursta sem gætu valdið óþroskuðum börnum hugarangri langt fram eftir aldri.

• Ég vil ekki að skólinn gefi barni mínu merktan Svala eða Trópí t.d. ef grillað er á vorhátíð skólans.

• Ég þakka æðri máttarvöldum fyrir það að búa ekki skólahverfi þar sem nemendur fá spjaldtölvu merkta tölvurisa til afnota í náminu.

• Ég vona að samfélagsfræðikennari barna minna muni aldrei sýna þeim fréttir eða vísa í vefslóðir hjá einum fréttamiðli umfram annan.

• Þau mega alls ekki fá fjármálafræðslu á unglingsárum því ég veit að einn banki vetti styrk við gerð kennsluefnis sem notað er.

• Það er eins gott að öll kennsluforrit sem notuð eru við kennslu komi frá Námsgagnastofnun en ekki einkaaðilum sem gætu haft hag að því að börnin mín sæki í forrit eða heimasíður þeirra.

• Ef þau þurfa að fara með skólarútu í sund þá vil ég að sú rúta sé ómerkt svo börnin mín þurfi ekki að aka um borgina á risastóru auglýsingaskilti einkaaðila.

• Ég vil ekki að börnin mín séu hvött til að „Gúggla“ eftir upplýsingum í náminu því það er líka hægt að „Binga“, „Yahooa!“ og „Webcrawla“

• Ég veit um börn í einum skóla sem fengu möppur með sér heim á fyrsta degi skólans undir heimanám. Þær voru merktar Múlalundi og ég ætla rétt að vona að það gerist ekki aftur.

• Komi til þess að rithöfundur mæti í heimsókn í skólann mega börnin mín ekki hlíða á hans upplestur, a.m.k. ekki ef hann kemur fram undir nafni. Sama gildir um tónlistarmenn/hljómsveitir sem eiga það til að heimsækja skóla. Þá mega börnin mín ekki hlusta á þá flytja tónlist ef það er tónlist sem þeir hafa eða hyggjast gefa út.

• Ég vona að ákveðin stefna sem rekur nokkra grunnskóla ná aldrei meiri útbreiðslu því þar er nemendum gert að vera í skólafatnaði/flíspeysum sem mér skilst að séu merktar ákveðnum og þekktum flíspeysuframleiðanda á norðurhjara

• Ég myndi brjálast ef barnið mitt fengi endurskinsmerki merkt tryggingafélagi.

Í alvöru þá tel ég þetta vera helstu ógn sem börn í skólum á Íslandi í dag standa frammi fyrir. NOT!