Kölluð rasisti, fasisti og nú síðast nasisti

Svo virðist sem stöðugt færist aukin harka í umræðuna á Íslandi. Ein þeirra sem telur sig merkja það er Guðfinna Jóh. Guðmundsdóttir, borgarfulltrúi Framsóknarflokksins, sem furðar sig á því að vera kölluð nasisti. Hún telur sig ekki hafa unnið fyrir þeim stimpli.

„Ég hef verið kölluð ýmsum nöfnum svo sem rasisti, fasisti og nú síðast kallaði Salmann Tamimi mig nasista fyrir þá skoðun mína að ég sé mótfallin því að trúfélögum sé almennt gefnar lóðir og á staðsetningu fyrirhugaðrar mosku í Sogamýrinni. Ég vil hins vegar árétta að ég er ekki á móti því að byggð moska í Reykjavík og hef aldrei verið,“ segir Guðfinna í viðtali við Vísi. Guðfinna segir sér ekki hafa sárnað vegna ummælanna, þau dæmi sig sjálf.

Hún vísar til viðtals sem DV var með við Salmann nú nýverið vegna umræðu sem geisaði í vikunni vegna umdeildra ummæla Sjálfstæðismannsins og þingmannsins Ásmundar Friðrikssonar þess efnis hvort ekki væri vert að rannsaka múslíma á Íslandi sérstaklega að teknu tilliti til þess hvort þeir hafi einhver tengsl við hryðjuverkahópa.

„Hann sakar Ásmund um það að vera spila sama pólitíska leikinn og borgarfulltrúar Framsóknarflokksins. „Það er eins og þau séu í einhverri undarlegri keppni um það hver sé mesti nasistinn,“ segir Salman, sem er mikið niðri fyrir í samtalinu við blaðamann.“

Guðfinna segist hingað til ekki hafa velt trúmálum neitt sérstaklega fyrir sér, segir að sér sé nokkuð sama hverrar trúar fólk er eða hvort það sé trúlaust. „Ég þoli hins vegar ekki öfgar hvort sem þær eru í nafni trúar eða ekki og vil opna umræðu um þessi mál. Oft á dag berast fréttir hingað til lands um voðaverk öfgahópa. Við þurfum að taka þá umræðu af skynsemi og yfirvegun m.a. hvort hætta sé á að slíkt berist hingað til lands og hvernig við eigum þá að sporna við því.“

Guðfinna segist aðspurð ekki hafa hugleitt hvort hún vilji kæra þessi ummæli en dæmi eru um slík mál. Vigdís Hauksdóttir, þingmaður Framsóknarflokksins, og reyndar fleiri Framsóknarmenn, kvartar undan því að umræða um flokk sin sé komin út yfir öll velsæmismörk.

„Sumir virðast vera með Framsóknarmenn á heilanum og reyna að upphefja sig með því að nota ýmis ummæli án tengsla við raunveruleg ummæli fulltrúa Framsóknar,“ segir Guðfinna um þá umræðu.