Segir eigur fyrir tugi milljóna enn ósóttar í fyrrum húsnæði Caruso

Þrúður Sjöfn Sigurðardóttir, annar eigenda veitingastaðarins Caruso, segir deilum hennar við feðgana Jón Ragnarsson og Valdimar Jónsson hvergi nærri lokið. Greint var frá því fyrr í dag að þeir hafa opnað nýjan veitingastað í húsnæði sínu við Þingholtsstræti, þar sem Caruso var áður, en Þrúður kveðst ósátt með það að eigur sem tilheyrðu Caruso séu enn geymdar í húsinu.

„Við höfum ekki fengið að taka neitt af okkar persónulegu eigum, við fengum bara að taka vín og matvörur fyrir áramót,“ segir Þrúður. „Við eigum í rauninni allt þarna inni, við erum náttúrulega búin að vera þarna í fimmtán ár.“

Hleypur á tugum milljóna

Mál Caruso vakti mikla athygli í desember. Jón og Valdimar virtust þá hafa tekið sér lögregluvald, farið inn á staðinn í leyfisleysi og skipt þar um skrár til að koma í veg fyrir að Þrúður og José Garcia, maður hennar og meðeigandi, kæmust þangað inn.

„Þeir bara þykjast eiga þetta allt saman,“ segir Þrúður. „Við erum með lögfræðing í málinu og erum að reyna að fara þá leiðina í kerfinu. En lögreglan hefur ekkert viljað hjálpa okkur að sækja þetta, sem er alveg óskiljanlegt.“

Sjá einnig: Húseigandinn lét færa milljóna tekjur inn á sinn eigin reikning

Meðal þeirra muna sem Þrúður og José gera tilkall til eru speglar, málverk og ýmis tækjabúnaður. Sumt af því segir hún þau hjónin hafa komið með að heiman. Kostnaðurinn hlaupi á tugum milljóna.

„Eigum allt okkar eftir á Þingholtsstræti“

Hjónin og feðgarnir höfðu átt í deilum áður en leigusamningur Caruso rann út þann 15. desember síðastliðinn. Daginn eftir létu þeir Jón og Valdimar læsa staðnum og varna starfsfólki aðgöngu. Svo fór að Caruso opnaði skömmu fyrir jól í nýju húsnæði, við Austurstræti 22.

„Það er búið að vera rosa mikið álag, en það gengur mjög vel þar,“ segir Þrúður. „En þetta er náttúrulega ekki búið, því við eigum allt okkar eftir þarna á Þingholtsstræti.“