Kvenlæg lesblinda

Framkvæmdastjórn Evrópu segir að lítil og meðalstór fyrirtæki séu hryggjarstykkið í efnahagslífi Evrópu. Hún segir að þau séu 99% fyrirtækja álfunnar, skapi 85% nýrra starfa og ráði tvo þriðju hluta starfshæfs fólks í vinnu. Konur eru stór hluti þessarar aukningar, reka oft lítil fyrirtæki í kringum sína sérfræðiþekkingu, byrja smátt og stækka síðan hægt og rólega.

Konur hafa verið taldar áhættufælnari stjórnendur í gegnum tíðina og er mjög oft komið fram við þær á þann máta. Það var því ansi áhugavert þegar kona nokkur tók þátt í tveimur viðskiptaáætlunarkeppnum hér á landi með sömu hugmyndina og sömu áætlunina. Hugmyndin snerist um nýsköpun á hönnunarsviði og var sami karlmaðurinn meðal dómara í báðum keppnum sem sérlegur fulltrúi nýsköpunar hjá hinu opinbera. Í fyrri samkeppninni, sem var eingöngu ætluð konum, fékk hugmyndin þá umsögn að hún væri áhugaverð en alltof hógvær, of lítill vöxtur sjáanlegur og því ekki spennandi fjárfestingakostur. Vinkonan tók sig þá til og gerði áhættusamari áætlun, breytti eingöngu Excel-áætlunarþætti hugmyndarinnar, skalaði hana upp og sendi í hina keppnina. Þar fékk hún þá umsögn, frá sama aðila, að þetta væri áhugaverð hugmynd en alltof áhættusöm og ekki raunsær vöxtur.

Niðurstaðan? Viðkomandi gat augljóslega ekki sett sig inn í hugmyndina, þekkti ekki til slíks rekstrar og faldi sig á bak við meinta áhættufælni kvenna.

Sama kona fór þá til bankans þar sem hún hafði verið tryggur viðskiptavinur í gegnum súrt, sætt og kreppu. Veðsetti heimilið sitt, kom verkefninu af stað, en vantaði síðan tvær milljónir til framleiðslunnar (var með sölusamninga upp á rúma milljón ásamt töluverðum áhuga frá markhópnum). Áhættan var lítil sem engin fyrir bankann sem hafði nú þegar veð í heimili konunnar. Svarið sem hún fékk á endanum frá yfirmanni, sem var karlmaður, var orðrétt: „Nei, því ég trúi ekki á þessa hugmynd en það væri gaman ef þú gætir „proof me wrong“.“ Svo mörg voru þau orð.

Hún fór í annan banka, lagði fram sömu gögn fyrir starfsmann þess banka sem í þessu tilfelli var kona, fékk tilboð í bankaviðskiptin og flutti sig síðan yfir í þann banka. Það má til gamans geta að salan fór fram úr væntingum og hefur hugmyndin staðið undir sér frá upphafi.

Sporin og hindranir sem konur þurfa að yfirstíga eru enn þá of mörg. Það er enn of mikil kvenlæg lesblinda til staðar.