Endaði alveg óvart í fyrsta sæti hlaupsins

„Ég bjóst aldrei í lífinu við að vinna þetta,“ segir Hrafnkell Hjörleifsson, fyrsti Íslendingurinn í mark í Reykjavíkurmaraþoninu á laugardag. Hrafnkell hljóp á tveimur tímum, 55 mínútum og sex sekúndum.

Hrafnkell ákvað í janúar að taka þátt í maraþoninu og æfði nokkuð stíft fyrir hlaupið. Á æfingatímabilinu hljóp hann lengst þrjátíu kílómetra. „Allt umfram það var ókannað svæði,“ segir hann.

„Svo kem ég í mark og fæ miða sem segir að ég eigi að koma í verðlaunaafhendingu því samkvæmt bráðabirgðaúrslitum hafi ég unnið til verðlauna. Ég hafði á bakvið eyrað að þessi tími myndi mögulega duga mér í þriðja sætið.“ Kynnir maraþonsins segir þá að verið sé að bíða eftir fyrsta Íslendingnum í mark en leiðréttir sig þegar hann sér að Hrafnkell var kominn yfir endalínuna. „Ég hélt þetta væri einhver villa í kerfinu. Svo bara kom í ljós að þetta var ekki villa.“

Hrafnkell segir að markmiðið hafi verið að hlaupa maraþonið á þremur klukkustundum. „Ég er svo sem ekki mikill hlaupari en er ágætur í að pína mig áfram umfram einhver þægindi.“

Hann segist ekki hafa lent á hinum fræga vegg sem maraþonhlauparar tala stundum um að þurfi að yfirstíga eftir ákveðið langt hlaup. „Eftir því sem leið á var þetta bara smávegis erfiðara, hvert skref aðeins þyngra. Það var mótvindur þegar ég var kominn út á nes. Sá kafli var kannski hvað erfiðastur.“

Hrafnkell segist ekki vera búinn að ákveða hvort hann ætli að halda hlaupunum áfram. „Ég get ekki toppað þetta. Þó ég myndi æfa mig eins og dýr fram að næsta hlaupi þá gæti ég kannski bætt tíma minn en mjög ólíklega varið titilinn. Í aðra röndina finnst mér eins og toppnum sé náð og maður eigi bara að hætta en svo freistar líka að hlaupa hraðar, betur og meira.“

Aðspurður hvort hann hafi fagnað þegar sigurinn var ljós segir hann: „Já, ég át ýmsa hluti sem ég borða ekki venjulega og fékk mér nokkra bjóra. Ég held að það fái ýmislegt að flakka þessa vikuna. Það er Megavika að byrja á Domino's á morgun svo ég er mjög spenntur fyrir því“