Forsetatíð Vigdísar með augum unga fólksins

Á sunnudaginn verður haldið upp á að 35 ár eru liðin frá því að Vigdís Finnbogadóttir var kosin forseti Íslands.

Haldin verður stór hátíð á Arnarhóli sem hefst klukkan 19.30 og mun standa til klukkan 21.00. Stofnun Vigdísar Finnbogadóttur annast skipulag hátíðarinnar í samstarfi við Alþingi, Háskóla Íslands, Reykjavíkurborg, Samband íslenskra sveitarfélaga, Samtök atvinnulífsins, framkvæmdanefnd um 100 ára afmæli kosningaréttar kvenna, skógræktar- og landgræðslufélög ásamt fjölda annarra stofnana og félagasamtaka.

Dagskráin verður fjölbreytt og inniheldur blöndu af tónlist og töluðu máli. Kolbrún Halldórsdóttir er listrænn stjórnandi hátíðarinnar. „Fyrir þessi merkilegu tímamót langaði okkur að horfa á líf og störf Vigdísar með augum þeirra sem ekki voru vaxnir úr grasi á árunum 1980–1996. Svo við leituðum til sviðslistadeildar Listaháskóla Íslands og Stúdentaleikhússins og fengum til liðs við okkur unga sviðshöfunda og leikara til þess að kynna sér aðdraganda þess að Vigdís gaf kost á sér í embætti forseta Íslands og árin hennar á forsetastóli,“ segir Kolbrún.

Efnið sem þessir ungu listamenn settu saman verður svo eins konar lím í dagskránni, rammi sem tengir saman fjölbreytt tónlistaratriði og ávörp.

Kolbrún segir unga listafólkið hafa lesið sér vel til um málefni Vigdísar. „Eftir að hafa kafað ofan í efnið og skrifað hugleiðingar sínar, var orðið til tæplega 30 bls. handrit með fjöldanum öllum af skemmtilegum hugmyndum. En þar sem tíminn er afar takmarkaður þarf formið að vera knappt, svo þau sigtuðu sig í gegnum textann með fínlegasta sigtinu í skúffunni og eftir sitja nokkur gullkorn sem þau munu flytja hátíðargestum á sunnudag.“ Alls komu átta sviðshöfundar og leikarar að þessari sköpun og sex þeirra munu standa á sviðinu og flytja afraksturinn.

„Þetta er búið að vera virkilega gefandi verkefni, sérstaklega að fá tækifæri til að skoða þessi merku tímamót í sögu okkar Íslendinga með augum þeirra sem muna Vigdísi ekki sem forseta en finnst hún samt hafa verið nálæg sem leiðtogi og fyrirmynd alla tíð.“

Þau sem koma að verkefninu eru Andrea Elín Vilhjálmsdóttir, Dominique Gyða Sigrúnardóttir, Birnir Jón Sigurðsson, Daníel Takefusa Þórisson, Júlíana Kristín Liborius Jónsdóttir og Kristín Ólafsdóttir. Auk þeirra lögðu Guðmundur Felixson og Þorvaldur S. Helgason hönd á plóg við handritsgerð og Andri Snær Magnason var þeim til halds og trausts.-gj