Ísland á sundkortið í Kazan

„Við höfum verið að strögla að komast inn í milliriðla og í úrslitariðla nánast alla þessa öld. Það að komast fimm sinnum inn í milliriðla og þrisvar í úrslit er langt umfram það sem við væntum,“ segir Hörður J. Oddfríðarson, formaður SSÍ, um frábæran árangur á HM í sundi sem lauk um síðustu helgi.

Þrisvar inn á topp tíu á sama HM

Hrafnhildur Lúthersdóttir komst í úrslit í tveimur greinum og varð fyrsti íslenski sundmaðurinn frá upphafi til að komast inn á topp tíu í þremur greinum á HM í 50 metra laug. Eygló Ósk Gústafsdóttir komst í úrslit í sinni bestu grein með því að setja tvö Íslands- og Norðurlandamet sama daginn. Bryndís Rán Hansen og Anton Sveinn McKee settu bæði met.

„Þetta er það besta sem við höfum gert á heimsmeistaramóti síðan í Fukuoka 2001,“ segir Hörður en Örn Arnarson vann bæði silfur og brons á HM fyrir fjórtán árum. Hörður nefnir sérstaklega þessi ár með bæði Jakobi Jóhanni Sveinssyni og Erni en þrátt fyrir góða möguleika þá náðu þeir ekki að setja saman eins flott heimsmeistaramót og þær Hrafnhildur og Eygló Ósk gerðu núna.

Erfitt að vera eini strákurinn

Stelpurnar stálu vissulega sviðsljósinu með frábærum árangri en fulltrúi karlpeningsins var líka að stimpla sig inn.

„Það var erfitt fyrir Anton að vera eini strákurinn í hópnum. Það voru sterkari andstæðingar sem hann var að kljást við en hann stóð alveg undir pressunni og tók meðal annars Íslandsmetið sem Jakob Jóhann Sveinsson setti fyrir einhverjum árum síðan. Þetta er hann að gera í miðjum breytingum því hann er að breyta sér úr því að vera langsundsskriðsundsmaður í það að verða bringusundsmaður. Það er líka ákveðið stökk,“ segir Hörður.

„Ég held að það hafi ekki gerst,“ segir Hörður aðspurður um það þegar bæði Hrafnhildur og Eygló náðu báðar að bæta sig tvisvar á sama deginum.

Eygló setti tvö Norðurlandamet sama daginn og Hrafnhildur bætti Íslandsmetið tvisvar í 200 metra sundinu saman daginn auk þess að jafna Íslandsmet sitt í 50 metra bringusundinu sama daginn og hún hafði sett það. „Þetta er eitthvað sem við höfum verið að vinna í en höfum ekki séð fyrr en núna,“ segir Hörður.

Bein til að bera mótlæti

„Hrafnhildur hefur bein til þess að bera mótlæti og nýtir það sér í vil sem er mjög mikill kostur. Ég sá það líka á þessu móti að þegar allt gekk ekki upp þá bætti Hrafnhildur í frekar en hitt. Það var mikil hvatning fyrir hina í hópnum,“ segir Hörður.

„Það að vera búin að ná þremur einstaklingum inn á Ólympíuleika, ári fyrir leika, er mjög athyglisvert. Ég man ekki til þess að við höfum náð því. Við höfum verið að ná lágmörkum alltof alltof seint sem hefur þýtt að það hefur ekki verið neinn undirbúningstími. Við vorum alltaf að ná lágmörkunum seinna og seinna í ferlinu og höfðum þannig minni og minni tíma til að aðstoða sundfólkið í því að byggja sig fyrir leikana,“ segir Hörður og bætir við:

„Núna erum við í þeirri óvæntu stöðu að við erum með þrjá sundmenn sem munu nota þennan vetur til þess að byggja sig upp og koma síðan vonandi inn á Evrópumótið næsta vor til þess að sýna að þau eigi erindi inn á Ólympíuleika og ná síðan vonandi að blómstra á leikunum,“ segir Hörður og sundheimurinn hefur tekið eftir litla Íslandi á þessu móti.

Hvað, Ísland aftur

„Við fáum mjög jákvæð viðbrögð og sumir eiga ekki orð að lýsa því hvað þeim finnst þetta hafa verið óvæntur árangur. Ég er að reyna að segja þeim að þetta var ekkert óvænt,“ segir Hörður í léttum tón.

„Allar þjóðirnar, hvort sem það eru vinaþjóðir okkar á Norðurlöndum eða hvaðan af þær eru úr heiminum voru að segja: „Hvað Ísland aftur“ og „Frábært að sjá ykkur stimpla ykkur inn,“ segir Hörður um viðbrögðin.

„Það er mjög mikill metnaður hjá okkar sundfólki og hann jókst bara við þennan árangur og þegar þau uppgötvuðu það hvað þau gátu gert þegar þau voru saman. Sundið er mikil einstaklingsíþrótt og það er ekki auðvelt að búa til mikinn hópanda í sundi. Það er hægt og það hefur mörgum tekist það en við höfum ekki endilega verið mjög góð í því fram að þessu,“ segir Hörður.