Galdur tónleikanna

„Við ætlum að spila margt sem fólk kannast vel við og annað sem það þekkir síður, þannig að fjölbreytnin verður allsráðandi,“ segir Elísabet Waage hörpuleikari en hún og Gunnar Kvaran sellóleikari efna til tónleika í Hannesarholti á miðvikudagskvöldið kl. 20.

„Þegar við fórum í að velja efnisskrána þá langaði okkur fyrst og fremst til þess að flytja Visions fugitives, sérlega áhrifamikla og fallega tónsmíð sem John Speight samdi fyrir okkur, en hann varð sjötugur í síðasta mánuði.

Í framhaldinu völdum við Couperin og tíndum svo til eitt og annað sem okkur finnst vera bæði skemmtilegt og fallegt. Þannig að við höfum trú á því að þetta verði í senn hugljúfir og skemmtilegir tónleikar.“

Elísabet og Gunnar hafa spilað saman síðan 1993 en reyndar kom dálítið hlé á tímabili á meðan Elísabet bjó erlendis. „Eftir að ég flutti aftur heim þá tókum við fljótlega upp þráðinn. Við gáfum út geisladisk 2004 með ýmsum perlum og höfum í hyggju að gefa út annan disk á næstunni.

Efnið sem við ætlum að taka upp er það sama og við ætlum að flytja á tónleikunum á miðvikudagskvöldið. Það er svo gott að vera búinn að spila efni á tónleikum áður en farið er í upptöku. Á tónleikum er einhver galdur sem á sér stað í samspilinu við áhorfendur. Eitthvað sem er aldrei til staðar í hljóðveri. Þessi galdur er ákaflega gefandi fyrir okkur tónlistarfólkið og í raun áheyrendur líka svo við erum farin að hlakka til miðvikudagsins.“