Ráðuneytið krefst skýringa frá Hreint ehf

Forsætisráðuneytið hefur ítrekað spurst fyrir um hvort ekki sé óyggjandi að fyrirtækið Hreint ehf. uppfylli að fullu ákvæði kjarasamninga vegna verkefna fyrirtækisins fyrir ráðuneytið.

Í tilkynningu frá ráðuneytinu segir að ráðuneytið hafi fyrir skömmu óskað eftir skriflegri yfirlýsingu frá Hreint þar sem fram kæmi skýr staðfesting á því að starfsfólk fyrirtækisins fái greitt samkvæmt gildandi kjarasamningi.

„Í framhaldi af því verður leitað álits viðkomandi stéttarfélags. Fyrir liggur að ef í ljós kemur að ákvæði kjarasamninga eru ekki að fullu uppfyllt verður samningi við fyrirtækið Hreint ehf. sagt upp.“

Í tilkynningunni segir að forsætisráðuneytið geri í öllum tilvikum skýra kröfu um að verktakar sem selji ráðuneytinu þjónustu eða vörur hlíti lögum og uppfylli í hvívetna skyldur gagnvart starfsfólki sínu. „Það á m.a. við um verktakasamning ráðuneytisins við fyrirtækið Hreint ehf. sem í gildi hefur verið frá árinu 2006.“

Fyrr í vetur birtust fréttir um að starfsfólk verktaka sem annast þrif á Landspítala hefði ekki fengið greitt samkvæmt gildandi kjarasamningi. Ráðuneytið hafi í kjölfarið ítrekað spurst fyrir um það hvort ekki sé óyggjandi að fyrirtækið Hreint ehf. uppfylli að fullu ákvæði kjarasamninga vegna verkefna fyrirtækisins fyrir ráðuneytið. Í svörum til ráðuneytisins hefur fyrirtækið staðfest að svo sé, en nú hafi verið fram á skriflega yfirlýsingu.