Svona eru þær hamingjusamar og hættu nú að dæma þær

Stjörnurnar eru víst mannlegar eins og við hin, þó svo að stundum virðist það fjarstæðukennt. Þær sem ekki uppfylla staðlaðar útlitskröfur verða iðulega fyrir barðinu á vökulu auga gagnrýnandi fjölmiðla og jafnvel almennings á samfélagsmiðlum.

Nú virðast þær stíga fram hver á fætur annarri og hafna þessum fyrirframgefnu hugmyndum um hvernig farsæld sýni sig og svara gagnrýnisröddum hástöfum. 

Pink, Kelly Clarkson og Chrissy Teigen eru örfá dæmi um þekkta einstaklinga sem stíga frækilega fram og bjóða gagnrýnisröddunum birginn. Þær nýta fræðgarðsólina til góðs enda fullkominn vettvangur til að koma skilaboðum áleiðis til gríðalega stórs hóps. 

Viðbrögð fylgjenda stjarnanna á Twitter og Instagram hafa ekki látið á sér standa og eru einhver besti vitnisburður um að þörfin fyrir byltingu í þessum málum er vissulega til staðar, en þakklætinu rignir bókstaflega yfir stöllurnar í kjölfarið.

Pink þótti helst til búttuð á samkomu til styrktar krabbameinssjúkum í þessum kjól. Blessunarlega er hún með munninn fyrir neðan nefið og bað trylltan lýðinn vinsamlegast um að hafa ekki áhyggjur af henni og holdafarinu. Henni liði sem blóma í eggi. Hún benti því til stuðnings á að dóttir hennar hefði spurt hana um daginn hvers vegna maginn á henni væri svona mjúkur, og svaraði hún til að hann væri einfaldlega hamingjusamur.

Aðdáendur stjörnunnar hafa kappkostað að þakka henni fyrir að vera slík fyrirmynd sem raun ber vitni.

Kelly Clarkson hefur ítrekað verið gagnrýnd fyrir að vera of feit og nýlega af þáttarstjórnandanum Chris Wallace hjá Fox News, sem stakk upp á að hún tæki því rólega í pönnupitsunum. Þetta kaus hann að láta út úr sér eftir að hún steig á svið eftir fæðingarorlof. Hún lét hann heldur betur heyra það, þó ekki sín vegna. Heldur vegna allra hinna óhörðnuðu stúlkna þarna úti sem litu svipað út og hún. 

Sundfatamódelið og eiginkona söngvarans John Legent þykir hressilega hispurslaus á samfélagsmiðlunum. Hún á yfir tvær milljónir fylgjenda á Instagram og nýtti sér vinsældirnar í vikunni til að koma slitförum sínu á lærunum í sviðsljósið. Hún sagði þau biðja að heilsa aðdáendendum. 

Þykir þetta sæta tíðindum í heimi filtera og myndvinnsluforrita. Hafa viðbrögð fylgjenda hennar ekki látið á sér standa og hrúguðust strax inn athugasemdir frá konum á öllum aldri sem samsömuðu sig henni og þökkuðu hugrekkið.