
Laug EHF að handboltaforystu Íslands?

Fréttablaðið reyndi áfram í gær án nokkurs árangurs að fá svör frá EHF og IHF um þessa furðulegu ákvörðun. Eins og greint var frá í gær hafa ekki verið lagðir fram neinir pappírar eða sannanir fyrir að fundur, þar sem reglugerð varðandi fyrstu varaþjóð var breytt, hafi einfaldlega farið fram.
„Það er nú bara þannig hjá IHF í dag að reglugerðarbreytingar fara ekki fram á þingi. Því var breytt fyrir nokkrum árum. Það er bara ráðið (EHF Council) sem breytir reglum eftir tilmælum framkvæmdanefndarinnar, en í henni sitja fimm manns. Hún breytir öllu nema því sem kemur að lögum eða dómstólum sambandsins. Ef framkvæmdastjórnin ákveður að leyfa fimm skref í handbolta verður það svo. Það sem hún leggur fyrir ráðið er samþykkt í 99,9 prósent tilvika,“ segir Kjartan.
Forseti EHF á staðnum?
Í framkvæmdastjórninni eru fimm menn; Egyptinn Hassan Moustafa, forseti IHF, Miguel Roca frá Spáni varaforseti, Króatinn Sandi Sola gjaldkeri, og tveir aðrir meðlimir; Joel Delplanque, forseti franska handknattleikssambandsins, og Tékkinn Frantisek Taborsky. Vitað er að Íslendingar voru ekki ánægðir þegar hann birtist allt í einu í þessari framkvæmdastjórn.
Þessir menn eiga að hafa, á fundi sínum í mars eða apríl, breytt reglunum, en enginn var látinn vita eins og kom fram í gær. Þeir leggja allar reglubreytingar fyrir ráðið sem átján meðlimir skipa.
Þeirra á meðal er Jean Brihault, forseti Evrópska handknattleikssambandsins, EHF. Því hlýtur það að vekja mikla furðu að EHF segist koma af fjöllum í þessu máli. Annaðhvort sat Brihault fundinn og EHF er bókstaflega að ljúga að íslensku handboltaforystunni, eða reglubreytingin hefur verið gerð í enn meiri kyrrþey og getur því vart talist lögleg.
Aum svör EHF
Guðmundur B. Ólafsson, formaður HSÍ, krafði EHF um svör í bréfi sem hann sendi í fyrradag og í gær barst svar. Ljóst er að EHF ætlar ekki að standa í lappirnar gagnvart Alþjóðasambandinu og hjálpa sérsambandi innan sinna vébanda. Rétt eins og þegar Fréttablaðið reyndi að grennslast fyrir um svör var HSÍ bent á að hafa samband við IHF.
Þar komst formaður HSÍ ekki í samband við nokkurn mann, ekki frekar en Fréttablaðið. Formaður handknattleikssambands þjóðar sem hefur verið á meðal þeirra tólf bestu í heiminum í um tveggja áratuga skeið fær ekki samband við Alþjóðasambandið. Stórfurðulegt.
„Við sendum annað bréf í gær og ítrekuðum spurningarnar. Ég hef verið að reyna að hringja í varaformann IHF en hann hefur ekki svarað,“ sagði Guðmundur við Fréttablaðið í gær, en er hann ekki vonsvikinn yfir frammistöðu EHF í þessu máli hingað til? „Jú, í raun og veru eru þetta vonbrigði,“ sagði formaðurinn.“
Þjóðverjar fagna
Þjóðverjar virðast eðlilega kampakátir með sætið á HM enda mikilvægt fyrir þessa stóru handboltaþjóð að komast á mótið. Þýskaland var ekki með á EM í Danmörku í janúar og eftir tap gegn Póllandi í umspilinu í síðasta mánuði stefndi í tvö stórmót án Þýskalands.
„Það er nú undir okkur komið, að sanna að við erum þess verðugir að vera með í Katar,“ sagði forseti þýska sambandsins í fréttatilkynningu um „wild card“-sætið á vefsíðu þýska sambandins. „Frammistaða okkar á HM 2013 borgaði sig,“ bætir hann við.
Bob Hanning, varaforseti þýska sambandsins, og Stefan Kretzschmar, fyrrverandi landsliðsmaður Þýskalands og núverandi sérfræðingur Sport 1, fögnuðu mjög á Twitter-síðum sínum.
Eini maðurinn sem virðist vera með óbragð í munni er annar gamall þýskur landsliðsmaður, Daniel Stephan, fyrrverandi leikmaður Lemgo og samherji Loga Geirssonar.
„Það er mikilvægt fyrir okkur að vera komnir aftur á HM en það sjá allir að þarna er verið að redda Þýskalandi fyrir horn. IHF þarf á Þýskalandi að halda og fann mjög vafasama leið til þess,“ sagði Daniel Stephan í viðtali við íþróttavef Sport 1 í Þýskalandi.
Tengdar fréttir

Einar: Við munum leita allra leiða
Framkvæmdarstjóri HSÍ er afar undrandi á þeirri ákvörðun að gefa Þýskalandi þátttökurétt á HM í Katar.

Íþróttaljós: Reglugerðin sem enginn vissi af
Alþjóðahandknattleikssambandið breytti reglunum um hvaða þjóð kæmi til vara ef einhver skyldi ekki fá keppnisleyfi, en lét engan vita. Framkvæmdastjóri evrópska sambandsins lætur ritarann svara spurningum fyrir sig.

Ísland ekki á HM þó svo Ástralía hafi hætt við
Þýskaland mun óvænt taka þátt á HM í Katar eftir að Ástralía dró sig úr keppni. Ísland tekur ekki sætið þó svo Ísland sé fyrsta varaþjóð frá Evrópu.

Formaður HSÍ: Vitum ekki um neinar reglubreytingar
Guðmundur B. Ólafsson, formaður HSÍ, segir að ákvörðun IHF um að hleypa Þýskalandi á HM hafi komið sér á óvart.

Landsliðsþjálfari Ástralíu brjálaður
Landsliðsþjálfari Ástrala í handbolta, Daninn Jan Ottosen, vandar forystu alþjóða handknattleikssambandsins, IHF, ekki kveðjurnar.

Formaður HSÍ: Fengum ekki fullnægjandi svör
Evrópska handknattleikssambandið bendir á Alþjóðasambandið og svarar engu.

EHF: Vissum ekki af þessu fyrr en eftir fundinn í gær
Evrópska handknattleikssambandið mun skoða ákvörðun Alþjóðasambandsins nánar.