Enginn hafði áhuga

Hljómsveitin Hjálmar heldur afmælistónleika í Hörpu í kvöld en tíu ár eru síðan fyrsta plata sveitarinnar, Hljóðlega af stað, kom út. Hjálmar hafa verið ein vinsælasta hljómsveit landsins undanfarinn áratug auk þess sem meðlimir hennar hafa starfað með fjölda þekktra listamanna með góðum árangri.

Haustið 2003 þegar upptökur á plötunni hófust í upptökuveri Geimsteins í Reykjanesbæ áttu þó ekki margir von á því að íslensk reggíhljómsveit gæti náð vinsældum hérlendis. Þorsteinn Einarsson, söngvari og gítarleikari sveitarinnar, var nýlega fluttur til landsins eftir nokkurra ára búsetu í Svíþjóð þegar hann kynntist félögunum Sigurði Guðmundssyni og Guðmundi Kristni Jónssyni.

„Ég þekkti þá ekki neitt áður en við kynntumst í upptökuveri Geimsteins haustið 2003. Þar byrjuðum við að taka upp nokkur lög og leika okkur með þessar hugmyndir. Hjálmar verða eiginlega til úr þeim upptökum. Í upphafi tókum við upp eitt og eitt lag en undir lokin tókum við smá rispu og kláruðum fyrstu plötuna.“

Enginn hafði áhuga á að gefa hana út að sögn Þorsteins þar til Rúnar Júlíusson hjá útgáfufyrirtækinu Geimsteini kom til sögunnar en hann hafði hvatt þá áfram í upphafi og var auk þess duglegur að gefa út efni frá lítt þekktum sveitum.

Platan kom út í október árið 2004 og fékk strax góðar viðtökur. „Hún fékk strax góða spilun í útvarpi, sérstaklega á Rás 2, og við vorum duglegir að spila á tónleikum þennan veturinn. Við bjuggumst sjálfir ekki við neinu sérstöku þótt við hefðum sjálfir fulla trú á okkur. Það varð strax góð mæting á tónleika okkar og til að mynda spiluðum við á Nasa fyrir troðfullu húsi tvisvar sinnum sömu helgina í upphafi árs 2005. Við áttum eiginlega von á því að þröngur hópur fólk myndi líka við tónlist okkar en svo var ekki því hún féll strax í kramið hjá mun stærri hópi.“

Hljóðlega af stað seldist í yfir 7.000 eintökum og ári síðar kom úr önnur plata þeirra sem bar nafn sveitarinnar. Hún festi hljómsveitina endanlega í sessi sem eina af vinsælustu sveitum landsins sem hún hefur haldið fram á þennan dag.

Á tónleikunum í kvöld spila Hjálmar efni af öllum plötum sínum auk þess sem nokkur lög af óútgefinni plötu norska listamannsins Erlend Øye verða leikin en liðsmenn Hjálma komu að gerð hennar.

„Með okkur verða einnig blásararnir okkar þrír, Samúel Jón Samúelsson, Kjartan Hákonarson og Óskar Guðjónsson. Matthías Hemstock trymbill spilar einnig með okkur og Steinunn Eldflaug Harðardóttir, betur þekkt sem DJ flugvél og geimskip, spilar með í einu lagi sem hún samdi með okkur. RVK Soundsystem sér svo um að spila vel valda reggítónlist áður en við stígum á stokk. Það verða aðeins einir tónleikar þetta kvöld og það er löngu uppselt. Við höfum aldrei spilaða saman í Hörpu og hlakkar auðvitað mikið til kvöldsins.“