Ákærði ekki viðstaddur á meðan stúlka sem kærði nauðgun ber vitni

Karlmanni sem ákærður er fyrir nauðgun í tjaldi í Vestmannaeyjum árið 2012 er gert skylt að víkja úr þinghaldi á meðan stúlka sem kærði hann gefur skýrslu við aðalmeðferð málsins.

Hæstiréttur staðfesti úrskurð Héraðsdóms Suðurlands í dag um að manninum beri að víkja en hann krafðist þess áður að úrskurður héraðsdóms yrði felldur úr gildi

Nauðgunin átti sér stað í tjaldi í Herjólfsdal þegar stúlkan var sautján ára og er ákærða gefið að sök að hafa þröngvað stúlkunni til samræðis, rifið í hár hennar, haldið höndum hennar niðri, bitið hana í neðri vör og reynt að setja getnaðarlim sinn í endaþarm hennar.

Fyrir réttinn var lagt vottorð geðhjúkrunarfræðings þar sem fram kemur að stúlkan hafi verið í meðferð á göngudeild geðsviðs vegna almennrar kvíðaröskunar. Frá október 2013 hafi hún verið í eftirliti og stuðningi gegnum síma í samvinnu við félagsráðgjafa. Hún sé tilfinningalega viðkvæm og einkenni hafi endurtekið versnað undir álagi með auknum kvíða og þunglyndi auk áfallastreitueinkenna.

Er það mat hjúkrunarfræðingsins að yrði brotaþoli sett í þær aðstæður að bera vitni í nærveru ætlaðs geranda væru raunverulegar líkur á því að hún upplifði sterkar neikvæðar tilfinningar og hugsanlega endurupplifanir sem gætu skert getu hennar til að greina frá reynslu sinni.