Tveir nýir dýrlingar

Talið er að um 800 þúsund pílagrímar hafi lagt leið sína til Rómar í dag til að fylgjast með athöfn í Vatíkaninu þar sem Frans páfi tók tvo forvera sína í starfi í dýrlingatölu.

Athöfnin í dag er merkileg fyrir nokkurra hluta sakir. Í fyrsta lagi er það fáheyrt að fyrrum páfi taki þátt í athöfn af þessu tagi en Benedikt 16. varð í fyrra fyrsti páfinn í rúm 600 ár til að afsala sér tigninni sökum heilsubrests.

Þá mun þetta vera í fyrsta sinn sem tveir fyrrum páfar eru teknir í dýrlingatölu í einu.

Páfarnir sem eftir daginn í dag teljast til dýrlinga eru annars vegar hinn pólski Jóhannes Páll 2, sem sat á páfastóli í 26 ár fram til ársins 2005. Hann sótti Ísland heim árið 1989.

Hinn er Jóhannes 23. Hann fæddist á Ítalíu árið 1881 og gengdi þessu æðsta embætti kaþólsku kirkjunnar frá 1958-63.

Jóhannes Páll 2. þótti um margt íhaldssamari páfi en Jóhannes 23, og vilja margir túlka ákvörðun Frans páfa um að taka þá báða í heilagra manna tölu tilraun til að sameina frjálslyndari fylkingar innan kaþólsku kirkjunnar við þá íhaldsamari.

Fylgismenn Jóhannesar Páls annars fögnuðu ákaft í dag en krafan um að hann yrði tekin í heilagra manna tölu heyrðist fyrst þegar hann lá banaleguna undir slagorðinu Santo Subito, sem útlegst dýrlingur strax.

Rótgrónar hefðir voru alsráðandi við athöfnina í dag. Hjá altarinu voru líkamsleifar af hinum nýju dýrlingum, blóðdropi úr Jóhannesi Páli öðrum og arða af húð Jóhannesar 23.

Frans páfi minntist í ræðu þessara forvera sinna í starfi sem sinntu þessu valdamikla embætti á róstursömum tímum í mannkynsögunni.