Pollurinn skólpmengaður næstu daga

Gera má ráð fyrir töluverðri skólpmengun í Pollinum og við Oddeyrartanga á morgun og í einhverja daga á eftir, vegna framkvæmda við fráveitukerfið á Akureyri. Íbúum Akureyrar og gestum er bent á að sjórinn og ströndin verði ekki hæf til sjósundsiðkunar eða útivistar á umræddum tíma.

 Slökkva þarf á skólpdælustöðvum í Hafnarstræti, við Torfunef, í Laufásgötu og á Silfurtanga. Það þýðir að skólp mun fara á yfirfallsútrásir í nágrenni viðkomandi stöðva. Skólp fer því í sjóinn á þeim stöðum.

„Kappkostað verður að dæling stöðvist í eins skamman tíma og kostur er. Vonast er til að hægt verði að gangsetja dælur aftur síðdegis þennan sama dag,“ segir í tilkynningu frá Norðurorku.

Heilbrigðiseftirlit Norðurlands eystra mun fylgjast með ástandi sjávar við strandlengjuna og færa inn upplýsingar á heimasíðu sína.