Borgin keypti fölsuð húsgögn í góðri trú

„Menn héldu að þetta væri ákveðin týpa af þessum stólum sem væri framleidd samkvæmt leyfi frá rétthafa,“ segir Kristbjörg Stephensen borgarlögmaður um Le Corbusier-stólana sem borgin hefur ákveðið að láta farga.

Ákvörðunin er tekin eftir að rétthafi Le Corbusier-húsgagnanna gerði athugasemd við þau. Fulltrúi húsgagnaframleiðandans Cassina, sem er rétthafi að Le Corbusier-vörumerkinu, heimsótti Ráðhúsið í sumar og gerði athugasemd við þau að heimsókn lokinni. Reykjavíkurborg svaraði erindi hans í gær þar sem fallist var á að farga þeim.

Borgarlögmaður segir að um 50 sæti sé að ræða en ekki 150 líkt og Skúli Rósantsson, söluaðili Le Corbusier-húsgagna á Íslandi, hélt fram í Fréttablaðinu í gær. Reykjavíkurborg greiddi 7,2 milljónir fyrir húsgögnin fyrir opnun Ráðhússins árið 1992, sem eru um það bil 18,7 milljónir króna að núvirði. Hefði verið um frumhönnun að ræða hefði borgin að líkindum þurft að greiða mun meira fyrir húsgögnin.

Borgarlögmaður segir að fyrir opnun Ráðhússins hafi verið óskað eftir tilboðum í húsgögnin. Þau hafi síðan verið keypt af versluninni Sess. Í sumar gerði rétthafi á framleiðslu Le Corbusier athugasemd eftir að fulltrúi hans hafði komið í húsið. Eftir það barst Reykjavíkurborg formlegt erindi með kröfu um förgun húsgagnanna. Reykjavíkurborg svaraði erindinu í gær þar sem fallist var á að húsgögnunum yrði fargað. 

Steve Christer, einn af arkitektum Ráðhússins, segir að arkitektarnir hafi talið á sínum tíma að þessi húsgögn hefðu verið framleidd með leyfi frá framleiðanda. Húsgagnasalinn Sess, sem seldi Reykjavíkurborg húsgögnin, hafi verið fullvissaður um það af framleiðanda að þau væru framleidd með leyfi. Christer segir erfitt fyrir sig sem arkitekt að heyra þessa umræðu sem hafi verið í gangi í nokkur ár að húsgögnin hafi ekki verið framleidd með leyfi frá rétthafanum.

RÚV hættir að nota sínar eftirlíkingar

Eftirlíkingar af Le Corbusier-húsgögnum sem hafa verið í notkun í sjónvarpsútsendingum hjá RÚV undanfarinn áratug munu birtast landsmönnum í hinsta sinn í þættinum „Raggi Bjarna: Þannig týnist tíminn“ sem sýndur verður á annan í jólum.

Þátturinn var tekinn upp fyrir rúmri viku, áður en umræða um eftirlíkingarnar komst í hámæli.

Skarphéðinn Guðmundsson, dagskrárstjóri hjá RÚV, gerir fastlega ráð fyrir að eftirlíkingunum, einum sófa og tveimur stólum, verði fargað á næstunni.