Eflum Myndlistarsjóð en skerum ekki niður!

Árið 2012 voru sett á Alþingi myndlistarlög. Lögin voru í smíðum í fjölda ára og var það mikill áfangi þegar breið samstaða náðist á Alþingi um setningu þeirra. Markmið laganna er að kveða á um skipan og fyrirkomulag myndlistarmálefna, efla íslenska myndlist og búa henni þannig skilyrði að hún fái dafnað til hagsbóta fyrir landsmenn alla.

Með lögunum voru myndlistarráð og Myndlistarsjóður lögfest. Hlutverk myndlistarráðs er skilgreint í lögunum og frá því ráðið hóf störf hefur verið lagður grunnur að því að markmið laganna náist. Myndlistarsjóður hefur verið á fjárlögum frá setningu laganna og árið 2013 var veitt til hans 45 milljónum. Hins vegar þurfti að berjast fyrir tilvist hans í lok síðasta árs og nú er gert ráð fyrir aðeins 25 milljónum í sjóðinn. Það er of lítið og mikilvægt er að settar verði a.m.k. 45 milljónir í Myndlistarsjóð.

Fjölbreytt og mikilvæg verkefni

Úthlutað hefur verið þrisvar úr sjóðnum á þeim tveimur árum sem lögin hafa gilt og má vera ljóst að sjóðurinn hefur verið kraftmikil innspýting í íslenskt myndlistarlíf og hefur leitt til þess að mikilvæg verkefni hafa orðið og verða að veruleika. Á árinu 2013 bárust alls 226 umsóknir um rúmlega 293 miljónir. Á þessu ári bárust 112 umsóknir um 107 milljónir fyrir þessa einu úthlutun sem eftir stendur. Hægt hefur verið að svara um 20% af þörfinni.

Það þarf því ekki að fjölyrða um að þörfin er mikil, styrkirnir hafa runnið til fjölbreyttra verkefna sem unnin eru af breiðum hópi fagmanna á sviðið myndlistar. Veittir hafa verið styrkir til smærri og stærri sýninga, til gerðar einstakra metnaðarfullra listaverka, til hátíða, fjölbreyttra samstarfsverkefna, til rannsókna og til þess að gefa út efni um íslenska myndlist.

Fyrir myndlistarsamfélagið í heild skipta þessir fjármunir afar miklu máli en sjóðurinn er fyrsti og eini opinberi verkefnasjóðurinn á sviði myndlistar. Margföldunaráhrif fjármagns af þessu tagi í íslensku samfélagi eru óvefengjanleg en við viljum hins vegar leggja áherslu á þau áhrif sem sjóðurinn hefur á starfsskilyrði listmanna, listastofnana og á menningarlífið í landinu.

Tækifæri til eflingar

Íslensk myndlist hefur verið í talsverðri sókn á undanförnum árum. Aðsókn að söfnum og sýningum hefur sjaldan verið meiri, íslenskir myndlistarmenn láta að sér kveða innanlands sem utan, háskólar landsins bjóða upp á fjölmargar vinsælar námsbrautir á sviði myndlistar og sókn er í útgáfu á efni um íslenska myndlist. Það má segja að talsverð bjartsýni hafi ríkt við setningu laganna, við blasti breytt landslag, lög með skýr markmið og nokkuð stöndugur sjóður sem aðeins mundi vaxa. Við blöstu tækifæri til að treysta og efla skipan málefna myndlistar hér á landi. En nú aftur ári eftir að barist var fyrir því að sjóðurinn héldist á fjárlögum, blasir við skerðing frá 45 milljónum í 25. Það er óásættanlegt og skammarlegt.

Með setningu myndlistarlaga og stofnun Myndlistarsjóðs var borið á frjóan jarðveg íslenskrar myndlistar og á þeim stutta tíma sem liðinn er frá setningu laganna hefur margt náð að dafna. Þannig viljum við að það verði áfram.

Við skorum á Alþingi, fjárlaganefnd og ráðherra menningarmála að beita sér fyrir því að sjóðurinn fái að lágmarki 45 milljónir á fjárlögum ársins 2015 þannig að þessi eini opinberi verkefnasjóður á sviði myndlistar hafi þau áhrif sem vænst var með setningu myndlistarlaga.

Fyrir hönd safna og listamiðstöðva Íslands

Hafþór Yngvason

Halldór Björn Runólfsson

safnstjóri Listasafns Reykjavíkur

Hlynur Hallsson,

safnstjóri Listasafnsins á Akureyri

Inga Jónsdóttir

safnstjóri Listasafns Árnesinga

Kristín G. Guðnadóttir

forstöðumaður Listasafns ASÍ

Kristín Dagmar Jóhannesdóttir,

listrænn stjórnandi Gerðarsafns, Listasafns Kópavogs

Ólöf K. Sigurðardóttir

safnstjóri Hafnarborgar, menningar- og listamiðstöðvar Hafnarfjarðar

Valgerður Guðmundsdóttir

framkvæmdastjóri Menningarsviðs Reykjanesbæjar

Þorgerður Ólafsdóttir,

formaður Nýlistasafnsins