Öryggisdagar Strætó og VÍS

Árlegir öryggisdagar Strætó og VÍS hófust 21. október og standa yfir í 5 vikur. Að þessu sinni er sérstök áhersla lögð á öryggi farþega Strætó ásamt almennu öryggi og er markmið átaksins að fækka slysum og árekstrum um 30% á milli ára. Átakið byrjaði innanhúss hjá Strætó, meðal annars með því að fara vel yfir öryggismál og einnig tóku starfsmenn þátt í að vinna þau skilaboð sem Strætó sendir frá sér í átakinu.

Öryggisdagar, sem eru haldnir árlega, eru samstarfsverkefni Strætó og VÍS og er ætlun þeirra að auka forvarnir í umferðinni. Með verkefninu vilja Strætó og VÍS leggja sitt af mörkum til að fækka slysum, efla öryggi farþega og starfsmanna Strætó, minnka tjón og auka almennt öryggi á götum borgarinnar. Umtalsverður árangur hefur náðst við að fækka tjónum og slysum frá því að öryggisdagar Strætó fóru fyrst í gang árið 2010. Árangurinn sýnir, svo ekki verður um villst, að með samstilltu átaki getum við bætt okkur í umferðinni.

Við státum af góðum árangri sem ber fyrst og fremst að þakka starfsfólki Strætó og virkri þátttöku okkar í að efla öryggi í akstri með vinnubrögðum sem eru til fyrirmyndar. Á síðustu tveimur árum hefur tjónum fjölgað aðeins aftur og því kappsmál að ná enn betri árangri. Með því að fækka tjónum og slysum aftur eykst öryggi okkar allra.

11 milljónir

Snögghemlun er algengasta orsök slysa á farþegum og er það nokkuð sem vagnstjórar hafa alltaf í huga því umhyggja fyrir farþegum okkar á að vera fyrsta boðorð í akstri Strætó.

Vagnstjórar Strætó eru meðvitaðir í umferðinni, ávallt á varðbergi og ástunda vistakstur. Vistakstur er mjúkur og þægilegur akstur sem fer vel með farartækið, farþega og ökumenn. Með því að halda vöku okkar og sýna sérstaka aðgát fækkum við óhöppum og bætum öryggi allra í umferðinni. Það verður aldrei hægt að komast algjörlega hjá því að hemla í neyð í þungri umferð höfuðborgarsvæðisins en með því að halda góðri vegalengd á milli bíla getum við minnkað áhættuna.

Í ár stefnir í að farþegar Strætó verði um 11 milljónir, við höfum jafnframt fjölgað ferðum og þar með eknum kílómetrum. En þrátt fyrir að við höfum í fleiri horn að líta þá er ég sannfærður um að við getum fækkað slysum og tjónum enn frekar með aukinni árvekni og fyrirhyggju.

Við hjá Strætó erum stolt af þeim árangri sem við höfum náð, en það má ekki sofna á verðinum. Öryggi í umferðinni er ekki átaksverkefni heldur þurfum við að sýna árvekni og vinna saman að fækkun slysa alla daga ársins. Það er von mín að með samstilltu átaki takist okkur að bæta þjónustuna og efla öryggisvitund okkar góða starfsliðs og annarra vegfarenda til langframa.