Haukur Páll "tók bara hjólið“ vegna meiðslanna

„Það kom smásnúningur á ökklann vegna höggsins. Nú er bara að vinna vel í þessu og sjá hvort maður verður klár fyrir fimmtudaginn,“ segir Haukur Páll Sigurðsson, fyrirliði Vals, en hann fór meiddur af velli undir lok sigurleiksins gegn KR í fyrstu umferð Pepsi-deildar karla í fótbolta á sunnudagskvöldið.

Haukur fékk hressilega tæklingu frá framherjanum Gary Martin en hann hitti hægri ökklann á fyrirliðanum.

„Ég er búinn að vera í smábasli með ökklann fyrir mótið. Við æfðum í hádeginu en ég tók bara hjólið á meðan strákarnir fóru út í fótbolta. Það er smábólga í þessu en ég er vel vafinn og mér líður betur núna en eftir leik. Það er bara Voltaren og svo keyra þetta í gang,“ segir Haukur og hlær við.

Valur mætir næst Keflavík á heimavelli á fimmtudagskvöldið þannig að Haukur Páll hefur nokkra daga til að jafna sig. Hann er liðinu auðvitað gríðarlega mikilvægur og er sannarlega skarð fyrir skildi þegar hann er ekki með.