Auki vatnsmagn setur Lagarfljótsbrú í hættu

Brúin yfir Lagarfljót við Egilsstaði er í hættu vegna of mikils vatns í ánni að sögn bæjarráðs Fljótsdalshéraðs.

„Aukið vatnsmagn í Lagarfljóti og ísmyndun við brúnna hefur leitt af sér raunverulegar áhyggjur af því að brúin geti við tilteknar aðstæður verið í hættu með alvarlegum afleiðingum, ekki síst þar sem vatnslagnir og rafmagns- og gagnakaplar liggja um brúna,“ segir í umsögn bæjarráðsins um þingsályktunartillögu um fjögurra ára samgönguáætlun 2013-2016.

„Sveitarfélagið leggur áherslu á að gert verði ráð fyrir gerð nýrrar brúar yfir Lagarfljót á samgönguáætlun. Endurnýjun brúarinnar hefur verið á stefnuskránni í áratugi,“ segir bæjarráðið.

Einnig er lögð áhersla á önnur samgönguverkefni. Meðal þess er stækkun flughlaða við Egilsstaðaflugvöll og gerð Fjarðarheiðaganga, milli Héraðs og Seyðisfjarðar.

„Ljóst er að bæði Fljótsdalshérað og Seyðisfjörður myndu hafa verulegan ábata af gerð ganganna enda um að ræða nauðsynlega samgöngubót sem styðja myndi við atvinnulíf á svæðinu.“