Meirihlutinn merkir við slysatryggingu á skattframtali

Árið 2013 merktu 147.500 Íslendingar við slysatryggingu við heimilisstörf á skattaframtali. Iðgjaldið er 450 krónur og því voru greiddar rúmar 66 milljónir króna til Sjúkratrygginga Íslands (SÍ) það árið.

SÍ taka við tilkynningum um slys og greiða út bætur ef umsókn er samþykkt. Á árinu 2013 barst 141 tilkynning um slys við heimilisstörf. Bótaskylda var samþykkt í 93 tilfellum og greiddu SÍ út 22 milljónir í bætur.

Hugtakið slys er skilgreint í lögum og reglugerð sem skyndilegur utanaðkomandi atburður sem veldur meiðslum á líkama þess sem er tryggður og gerist án vilja hans. Því nær tryggingin ekki til allra atvika eða meiðsla sem geta átt sér stað við heimilisstörf. Ef maður dettur um stól við þrif getur það fallið undir slysahugtakið. Ef maður aftur á móti misstígur sig við þrif án utanaðkomandi áhrifa, gæti það fallið utan tryggingaverndar.

Berglind Ýr Karlsdóttir er deildarstjóri slysa- og sjúklingatryggingar. Hún segir af og frá að SÍ græði á heimilistryggingunni vegna 44 milljóna króna mismunar á iðgjöldum og greiðslu bóta. „Stofnunin situr ekki uppi með gróða eins og tryggingafélag. Heimilistryggingin er partur af stórum flokki slysatrygginga sem falla undir almannatryggingar. Mismunurinn vegna heimilistryggingar rennur til þeirrar heildar. Það er ekki þannig að það safnist sjóður,“ segir Berglind. 

Hún segir tvö þúsund tilkynningar berast stofnuninni árlega. Slys vegna heimilisstarfa eru eingöngu 7-8 prósent af tilkynningum. En gæti verið að fáir viti um rétt sinn til bóta og merki við skattskýrsluna hugsunarlaust?

„Við getum ekki vitað það. En reglugerð um trygginguna var víkkuð út árið 2012 þannig að hún gildi líka fyrir viðhaldsstörf og viðgerðir á heimilinu. Við höfum satt best að segja búist við að tilkynningum fjölgi í kjölfarið. Það á kannski eftir að koma betur í ljós á næstu misserum.“