Fluttur nær dauða en lífi á sjúkrahús

Maður á fertugsaldri féll í dá eftir að hafa hlotið alvarlegan insúlínskort á meðan hann var í haldi lögreglu. Atvikið átti sér stað í lok febrúar síðastliðnum en maðurinn hafði verið handtekinn grunaður um líkamsárás.

Maðurinn er haldinn sykursýki af týpu 1 og þarf reglulega insúlínskömmtun. Hann segir að hann hafi margbeðið lögreglu um að veita sér insúlín en án árangurs. Ekki er vitað hvers vegna lögreglan varð ekki við beiðni mannsins.

Insúlínskömmtun sjúklinga með sykursýki er misjöfn en dæmi eru um að sjúklingar sprauti sig með insúlíni nokkrum sinnum á dag. Mikilvægt er að viðhalda insúlínmagni líkamans en ef slæm stjórn er á insúlíngjöf getur það haft varanleg áhrif á líkamsstarfsemi sjúklings og skemmt líffæri.

Maðurinn kom á gjörgæsludeild Landspítalans í fylgd lögreglu og haft var samband við nánustu ættingja mannsins þegar alvarlegt ástand hans var ljóst. Maðurinn segir að sér hafi vart verið hugað líf þegar hann kom á sjúkrahúsið.

Lífshættulegt ástand skapaðist en manninum var haldið sofandi um nokkra hríð vegna alvarleika ástands hans. Hann dvaldi á spítalanum í nokkra daga.

Lögmaður mannsins, Guðmundur St. Ragnarsson, segir að farið verði fram á rannsókn frá lögreglu vegna málsins „Hann var fluttur nær dauða en lífi á spítalann. Ég mun óska eftir því að lögreglan upplýsi hvað átti sér þarna stað.“

Guðmundur segir að ekki hafi verið tekin ákvörðun um hvort atvikið verði kært til lögreglu enda liggi ekki nægar upplýsingar fyrir um tildrög þess.

Ekki er leyfilegt að halda mönnum sem hafa verið handteknir lengur en í sólarhring ef ekki er óskað gæsluvarðhalds. Það er því ljóst að hið lífshættulega ástand mannsins skapaðist á nokkrum klukkustundum.

Heimildir Fréttablaðsins herma að lögregla hafi vaktað manninn um skamma hríð á meðan hann lá á gjörgæsludeild. Maðurinn er kominn úr lífshættu og dvelur ekki lengur á spítalanum.