Dönsurum létt við starfslokin

„Það hafa fjórir starfsmenn hætt hjá Íslenska dansflokknum frá því Lára hóf störf sem listdansstjóri, og ekki bara dansarar,“ segir Hannes Þór Egilsson, dansari. „Svo hafa margir farið í leyfi undanfarna mánuði og í raun beðið eftir að hún hætti, þar á meðal dansarar sem hún hafði nýlega ráðið.“

Í gær var undiritað samkomulag milli Láru og mennta- og menningarmálaráðuneytisins um starfslok hennar. Í viðtali við Fréttatímann segir hún starfið hafa snúist upp í martröð eftir að dansarar flokksins snérust gegn henni, kvörtuðu undan henni í fjölmiðlum og sökuðu hana um einelti. Lára hafnar því í viðtalinu og segist einfaldlega hafa gert kröfur og hafi viljað auka metnað flokksins.

„Lára talaði mikið um stefnubreytingar en var algjörlega stefnulaus stjórnandi. Við dansararnir tjáðum oft óánægju okkar við hana, á yfirvegaðan og kurteisan hátt, og báðum um skýrari sýn en það gerðist aldrei neitt,“ segir Hannes.

Hann segir ítrekað hafa verið troðið á rétti dansara vegna samskipta- og skipulagsleysis stjórnanda. Einnig að Lára hafi hafið störf ákveðin í að bæta fjárhagsstöðu, fjölga áhorfendum og ferðast meira um landið með sýningar. „En með hennar stjórnarháttum þá varð staðan á öllum þessum þáttum verri.“

Síðasta vor skrifuðu dansararnir Láru bréf og báðu hana að segja af sér vegna óviðunandi ástands innan flokksins. Hún hafnaði því. Í kjölfarið leitaði Hannes á ný mið og fór í launalaust leyfi frá flokknum því hann treysti sér ekki til að vinna lengur með Láru. Hann sagði svo starfi sínu lausu í desember því engar breytingar virtust vera í sjónmáli.

Samkvæmt dönsurum sem Fréttablaðið ræddi við versnaði ástandið til muna síðasta vor. Þá sendu þeir skýrslu um stöðu mála til mennta- og menningarmálaráðuneytisins og báðu um aðstoð. Ráðuneytið brást við fjórum mánuðum síðar og varð sá biðtími til þess að fleiri dansarar gáfust upp á ástandinu og fóru í leyfi.

Ráðuneytið heimilaði að vinnusálfræðingur starfaði með flokknum, sem var var ráðinn af Láru og ræddi við alla starfsmenn flokksins síðasta haust. Dansararnir fengu aldrei að heyra niðurstöðu skýrslu sálfræðingsins og engin úrlausn varð á málum fyrr en nú þegar Lára hefur samið um starfslok sín.

Dönsurum er létt við starfslokin og sagði dansari sem blaðið ræddi við að þau séu bjartsýn á framtíðina. „Við erum mörg hver búin að taka þátt í uppbyggingu á flokknum og þykir mjög vænt um þessa einu dansstofnun á Íslandi. Nú viljum við bara byggja flokkinn aftur upp og trúum að það sé hægt vegna þeirrar samheldni sem hefur alltaf ríkt í flokknum fyrir utan síðasta árið.“