Antíkbúðum í miðborginni fækkar

Eigandi verslunarinnar Antikmuna á Klapparstíg hefur ákveðið að loka versluninni eftir 40 ára rekstur í miðborginni. Verslunin mun loka eftir næstu mánaðarmót, um svipað leiti og Fríða frænka. Eftir verða tvær antikverslanir í miðborginni, eftir því sem Fréttablaðið kemst næst.

„Þegar maður stendur á krossgötum er bæði ákveðin eftirvænting í því að takast á við eitthvað nýtt, en um leið söknuður eftir þessu gamla. Ég er búinn að vera hérna í rúmlega tuttugu ár,“ segir Ari Magnússon, eigandi Antikmuna.

Ari segir húsnæðið einfaldlega of dýrt miðað við veltu verslunarinnar. „Það koma alltaf tískusveiflur í þessum bransa, það var til dæmis mjög mikið um að vera á tíunda áratugnum,“ segir Ari.

„Það komu til mín ungar athafnakonur sem leist svo vel á þennan stað og langar til að vera með verslun með hönnun fyrir túristana. Mér leist svo ljómandi vel á þetta að ég ákvað að leigja þeim húsnæðið,“ segir Ari.

Antikmunir tók til starfa á Laufásveginum árið 1974, en móðir Ara tók við rekstrinum tveimur árum síðar. Verslunin flutti svo á Klapparstíginn árið 1992, en þá hafði Ari hætt á sjó og tekið við rekstrinum af móður sinni.

„Við verðum með opið áfram fram í fyrstu vikuna í apríl,“ segir Ari. Hann segir mikið til af fallegum munum og allt verði selt á útsölu áður en verslunin loki. Útsalan hefst á fimmtudag.

Hann segir árin í miðborginni hafa verið góð, en segir framkvæmdir þar hafa sett svartan blett á þann tíma. „Það hefur verið mjög erfitt fyrir reksturinn þegar framkvæmdir sem hafa verið í gangi hér hafa dregist úr hömlu.“

Ari er þó ekki alveg hættur í antikvörunum, því hann ætlar að koma sér upp aðstöðu til að gera við og verðmeta fyrir þá sem hafi áhuga á slíkri þjónustu.

Selur antik á netinu

Antikmunir er ekki eina antikverslunin í miðborginni sem fer að loka dyrunum í síðasta skipti. Verslunin Fríða frænka skellir í lás um mánaðarmótin, segir Anna Ringsted, eigandi verslunarinnar.

„Ég ætla að hætta á toppnum, mig langar til að breyta til. Það fylgir þessu brjálæðislega mikil vinna, og ég ákvað að hætta áður en ég fengi nóg,“ segir Anna. 

Hún segir reksturinn blómlegan, og vistina í miðborginni hafa verið góða. Nú ætlar hún hins vegar að söðla um og stefnir á að opna vefverslun með antikmuni með haustinu.