Ósátt við vinnubrögð ráðuneytis

Ríkisendurskoðun er ekki sátt við vinnubrögð forsætisráðuneytisins við umdeilda úthlutun á 205 milljónum króna til verkefna víða um land sem lúta að húsfriðun, græna hagkerfinu og varðveislu menningarminja.

„Það hefur löngum verið okkar afstaða varðandi svona styrki og úthlutanir úr þeim að allir sjóðir sem eru með sama hætti á vegum stofnana ríkisins eða ráðuneyta eiga að sæta sömu meðferð. Það þarf að gæta jafnræðis,“ segir Sveinn Arason, ríkisendurskoðandi, aðspurður.

Í Fréttablaðinu í gær kom fram að tæplega helmingur hinna 205 milljóna, eða 97 milljónir, fer til verkefna í kjördæmi forsætisráðherrans Sigmundar Davíðs Gunnlaugssonar, Norðausturkjördæmis. Styrkirnir voru ekki auglýstir og ekki kemur fram að í öllum tilvikum hafi verið úthlutað á grundvelli skriflegrar umsóknar. Brynhildur Pétursdóttir, þingmaður Bjartrar framtíðar, bar fram fyrirspurn um úthlutunina á Alþingi. Hún segist ekki hafa fengið svör við því hvort gætt hafi verið jafnræðis. Hún hefur óskað eftir sérstakri umræðu um málið á Alþingi.

Sveinn segir að allir eigi rétt á því að sækja um styrki úr sjóðum sem þessum. „Það á að vera fagnefnd sem metur umsóknirnar og setur verkefnin í þá röð sem hún telur vera æskilegust og brýnust. Ef nefndin tekur ekki sjálf endanlega ákvörðun, heldur ráðherra, þá á það að gerast á grundvelli slíkrar niðurröðunar. Öll frávik frá svona regluverki erum við mjög ósáttir við,“ segir hann.

Spurður hvort Ríkisendurskoðun ætli að skoða málið nánar segir Sveinn stofnunina alltaf skoða allar fjárreiður ríkisstofnana eftir því sem mannskapur og tími leyfir. „Þegar við verðum varir við svona hluti, þegar menn eru að fara framhjá þessum hefðbundnu leikreglum, er eðlilegt að við horfum til þess. Væntanlega munum við grípa til einhverra fyrirspurna og ályktana í framhaldi af því, að gefnum svörum.“

Sveinn segir vinnubrögðin vera öðruvísi en hann hefur áður vanist. „En við höfum samt í gegnum tíðina verið að finna að því að menn séu að úthluta úr svona fjárveitingu ríkisins þar sem menn sitja ekki við sama borð. Það hefur áður komið fram í athugasemdum okkar við ráðuneytin.“