Borgin leyfir komu varðskipa

Ályktunartillaga sem sjálfstæðismenn í borgarstjórn lögðu fram í byrjun febrúar um erlent björgunarstarf hefur verið samþykkt.

Tillagan kveður á um að borgarstjórn fagni samstarfi í björgunarmálum við erlendar vinaþjóðir og bjóði skip þeirra velkomin til Reykjavíkur. Þessi stuðningur fulltrúa meirihlutans, sem var gerður með örlítilli breytingu, markar því stefnubreytingu.

„Ég er mjög ánægður með þetta. Borgarstjóri hafði látið í ljósi ákveðinn fjandskap fannst manni við komur erlendra skipa hingað til lands, herskipa eða varðskipa,“ segir Kjartan Magnússon, borgarstjórnarfulltrúi.

„Í umræðum fyrr á kjörtímabilinu spurðum við hvort þetta ætti líka við um þessi dönsku og norsku varðskip sem Landhelgisgæslan hefur verið í samstarfi við og fengum þau svör að svo væri. Okkur fannst það gífurlega slæm skilaboð og vorum hrædd um að þau gæti dregið úr þessu samstarfi og stefnt því í hættu,“ segir hann.

„Þegar ummæli borgarstjóra urðu aðeins óljósari töldum við rétt að fá úr þessu skorið og lögðum þá fram þessa tillögu.“

Fulltrúi Vinstri grænna greiddi atkvæði á móti afgreiðslunni.