Segir íbúa gjalda fyrir aðra hagsmuni

„Mann grunar að allt þetta ferli sé undirlægjuháttur við utanaðkomandi yfirvöld,“ segir Vigfús Andrésson í Berjanesi austan Holtsóss um fyrirhugaða lengingu varnargarðs vestan Markarfljóts.

Vigfús er einn þeirra íbúa austan Markarfljóts sem mótmælt hafa áformaðri 250 metra lengingu varnargarðsins. Beina á fljótinu lengra til austurs til að freista þess að minnka sandburð í Landeyjahöfn svo halda megi höfninni oftar opinni fyrir farþegasiglingar til og frá Vestmannaeyjum. Vigfús gagnrýnir að sveitarstjórn Rangárþings eystra kalli röksemdir og ótta íbúanna misskilning.

„Það sem íbúarnir vilja, ekki síst þeir sem eiga heimili og lönd að fljótinu, er að sveitarstjórnin segi það skýrt og skorinort að því aðeins verði leyft að lengja þessa leiðigarða ef varnargarður að austanverðu verður byggður að minnsta kosti jafnhliða,“ segir Vigfús sem undirstrikar að menn óttist um lönd sín og mannvirki ef Markarfljót flæðir til austurs inn í Holtsós.

„Afleiðingarnar gætu orðið geigvænlegar. En kannski vega líf og limir íbúanna austan Markarfljóts meira en aðrir hagsmunir. Það er ljótt að segja þetta, en hvað á manni að detta í hug? Það er enginn Eyfellingur á móti því að samgöngur batni til Eyja en röng staðsetning hafnarinnar er rót þessa vanda,“ segir Vigfús Andrésson.