Býttar á mat, garni og fötum

Hafdís Bjarnadóttir stofnaði nýverið Facebook-síðu þar sem fólk getur býttað á ýmsum frosnum réttum sem það hefur eldað. Hugmyndina að Facebook-síðunni Matarbýtti fékk Hafdís eftir samtal við góða vinkonu.

„Hún hefur mjög gaman af að elda en gefst minni tími til þess eftir að hún eignaðist barn á síðasta ári. Hún brást við með því að undirbúa matinn fyrir allan mánuðinn með því að elda og setja í frysti. Ég fór sjálf að elda og frysta enda oft upptekin seinnipart dags og þá er gott að eiga eitthvað í frysti sem búið er að elda og sem hita má upp. Vandinn er sá að frystirinn minn er lítill og fljótur að fyllast. Þannig sá ég fram á að við þyrftum að borða sama matinn með stuttu millibili. Þá fékk ég þessa hugdettu hvort ég gæti býttað við aðra á frosnum mat í gegnum Facebook. Sá einnig fyrir mér að þetta væri sniðugt fyrir fólk sem eldar fyrir lítil heimili og neyðist til að kaupa mat í stórum skömmtum. Þá gæti þetta líka orðið til þess að maður fengi að smakka ýmsa rétti sem maður kann ekki sjálfur að elda.

Hafdís stofnaði því Facebook-síðuna og viðbrögðin hafa verið góð. „Fólki finnst þetta sniðugt og það tínist hægt og hljótt í hópinn. Við erum orðin 48 núna,“ segir Hafdís sem bjó til garnbýttihóp á netinu í fyrra og í honum eru yfir 400 manns sem býtta á garnafgöngum.

En er fólk ekki feimið að fá mat hjá fólki sem það þekkir ekki neitt? „Ég hafði nú dálitlar áhyggjur af því en langaði samt að prufa þetta. Síðan fær maður tilfinningu fyrir fólkinu og hvort það er á sömu línu og maður sjálfur. Ég hugsaði síðuna líka á þann hátt að maður gæti komist í tengsl við einhvern tengdan manni sem er að elda,“ segir Hafdís en hún bendir á að hugmyndin sé ekki ný af nálinni. „Það er til dæmis til síða sem heitir www.shareyourmeal.net þar sem allur heimurinn er undir. Þar getur fólk skráð sig, matinn sem það er að elda, magn og verð,“ lýsir Hafdís.

Hagsýni er Hafdísi afar hugleikin. Árið 2013 skoraði hún á sjálfa sig að eyða ekki krónu í föt nema selja önnur föt á móti. „Ég stóðst áskorunina og fjármagnaði fatakaup á alla fjölskylduna með því að selja gömul föt og dót úr geymslunni á bland.is, fataskipti.is og ýmsum flóamörkuðum,“ segir Hafdís sem fann verulega fyrir þessu átaki í buddunni. „Mér tókst til dæmis að borga upp eitt bílalán á árinu.“

Hafdís lærði margt af átakinu. „Ég er orðin mjög hagsýn í fatakaupum. Ég keypti mikið í Kolaportinu, á bland.is og fataskipti.is og fann ýmislegt fínt með því að gramsa. Þá keypti ég líka inneignarnótur og gjafabréf á góðum afslætti sem fólk var að selja á bland.is,“ segir Hafdís en þannig fjármagnaði hún kaup sín á brúðarkjólnum sínum. „Mér finnst ég kunna að meta betur gildi hlutanna enda meira puð að eignast þá,“ segir hún glaðlega.