Fékk hugmyndina upp úr ælupest sonar

„Strákurinn minn fékk ælupest og konan mín kom heim með barnablað sem átti að gleðja strákinn og þá fékk ég hugmyndina um að búa til hresst skemmtirit fyrir fullorðna,“ segir gleðigjafinn Þorsteinn Guðmundsson, sem gaf um liðna helgi út nýtt tímarit sem kallast Glott.

Um er að ræða tímarit sem stefnt er á að gefa út einu sinni í mánuði.

„Viðtökurnar hafa verið mjög góðar þannig að ég er bjartsýnn á framhaldið.“

Spurður út í titil tímaritsins, segir Þorsteinn hann vera niðurstöðu ákveðins hugarflugs. „Ég vildi láta titilinn tengjast hlátri og brosi. Bros er bara of væmið en glott er betra og lifir af.“

Nokkrir höfundar sem skrifa í blaðið og á meðal pistlahöfunda eru Ari Eldjárn, Doktor Gunni, Guðlaug Elísabet Ólafsdóttir, Helga Braga Jónsdóttir og svo er viðtal við Hannes Þór Halldórsson, landsliðsmarkmann í knattspyrnu. Þó skrifa ekki alltaf sömu höfundarnir í öll blöðin.

„Við viljum að efni blaðsins sé létt og það sé húmor í því þannig að við sleppum allri pólitík og dægurmálum, viljum að þetta sé tímalaust blað. Þetta er samt ekki brandarablað,“ bætir Þorsteinn við.

Það verða þó ekki alltaf sömu pistlahöfundarnir sem skrifa í blaðið nema Halldór Baldursson.

„Halldór verður alltaf með framhaldssögu, hann á marga aðdáendur og set ég hans opnu í miðjuna svo það sé hægt að taka hana úr eins og menn gerðu við plakötin í gamla daga. Það er ákveðinn gamaldagsfílingur yfir þessu.“

Þorsteinn segir það ekki vera á döfinni að gera Glott að veftímariti en útilokar þó ekki að Glott fari á netið í framtíðinni.

Ásamt skrifum og tímaritssmíði kemur Þorsteinn fram með Mið-Íslandi á uppistandi í Þjóðleikhúsinu á næstunni. „Mér er líkt við Eið Smára í Mið-Íslandi því mér er alltaf skipt inn á þegar mikið liggur við.“