Ber meiri virðingu fyrir Miley

„Þetta var mjög áhugavert. Ég var í veislu með vinafólki hér á Akureyri og þekkti ekki marga í partíinu. Þegar ég sá að þetta væri fyrsta atriðið hugsaði ég: Þetta verður eitthvað. En svo var þetta allt í lagi,“ segir leikarinn Hannes Óli Ágústsson. Hann túlkaði forsætisráðherrann Sigmund Davíð Gunnlaugsson í Áramótaskaupinu og var allsnakinn á niðurrifskúlu í upphafsatriðinu.

Atriðið var skopstæling á tónlistarmyndbandi söngkonunnar Miley Cyrus við lagið Wrecking Ball. „Þetta var fyndinn tökudagur. Þetta var með síðustu atriðum sem voru tekin upp. Ég bý á Akureyri og átti fyrsta flug um morguninn til að mæta í tökur eldsnemma. En svo var veðrið slæmt þannig að ég var veðurtepptur. Loksins fékk ég flug. Ég er drifinn inn í stúdíóið, ég klæddi mig úr og þurfti að hanga samtals á þessum bolta í fimm mínútur. Þá var þetta búið,“ segir Hannes. Sem betur fer tóku tökurnar ekki lengri tíma því kúlan fór ekki vel með djásn leikarans.

„Ég þurfti að hagræða þeim aðeins, en virðing mín fyrir þessari blessuðu söngkonu jókst. Það er ekkert smá erfitt að hanga á þessari kúlu.“

Hannes er afar ánægður með Áramótaskaupið og gengur glaður inn í nýja árið. „Ég er að leika með Leikfélagi Akureyrar annað árið í röð og 17. janúar frumsýnum við Gullna hliðið eftir Davíð Stefánsson í leikstjórn Egils Heiðars Antons Pálssonar. Mjög skemmtileg nálgun á þetta klassíska verk.“