Yfir 100 fjölskyldur óska eftir aðstoð

Yfir 100 fjölskyldur hafa leitað til Fjölskylduhjálpar og óskað eftir aðstoð við fermingar í ár. Eins og staðan er núna getur Fjölskylduhjálp ekki annað eftirspurninni.

„Fólk er helst að biðja um fjárstyrk, en við höfum frekað farið þá leið að hjálpa fólki með grunnatriðin,“ segir Ásgerður J. Flosadóttir hjá Fjölskylduhjálp Íslands.

Fjölskylduhjálp biðlar til almennings um að þegar keypt er inn að hafa þá í huga sem eiga í fjárhagserfiðleikum varðandi fermingu barna sinna. Hún segir margt smátt gera eitt stórt og óska þau eftir ýmsu í bakstrinn ásamt fatnaði á börnin

„Við erum að tala um smjör,egg, servíettur og slíka hluti til þess að halda litla veislu. Síðan eru það fermingafötin. Við biðjum landsmenn um að senda okkur notuð fermingaföt barna sem fermdust í fyrra.“

Fjölskylduhjálp Íslands er til húsa að Iðufelli 14, Reykjavík og Baldursgötu 14, Reykjanesbæ.