„Fyrir neðan virðingu Alþingis“

Þingmenn tókust á af hörku í þingsal í gær, þegar umræða um Evrópuskýrslu Hagfræðistofnunar Háskóla Íslands var á dagskrá. Efnisatriði skýrslunar voru þó í aukahlutverki, stór hluti umræðunnar fór í þingsályktunartillögu Gunnars Braga Sveinssonar utanríkisráðherra, sem felur meðal annars í sér að draga aðildarumsókn Íslands í ESB til baka. Einnig var fundarstjórn forseta til umræðu og undir lokin snérust ræður að miklu leyti um hvort slíta ætti þingfundi, vegna þreytu þingmanna. Fundi var slitið klukkan 23:40 í gærkvöldi. Umræðu um Evrópuskýrsluna var frestað og verður fyrsta mál á dagskrá í dag þegar þingfundur hefst klukkan 15.

Fréttnæmasta atvik kvöldsins var væntanlega frammíkall utanríkisráðherra, Gunnars Braga Sveinssonar, í ræðu Steingríms J. Sigfússonar, þingmanns Vinstri grænna. Steingrímur fór fram á afsökunarbeiðni frá Gunnari Braga vegna orðalags þingsályktunartillögu hans.

Þegar Steingrímur var að ljúka ræðu sinni þar sem hann gagnrýndi utanríkisráðherra kallaði sá síðarnefndi fram í: „Ég hef þó ekki logið að þinginu eins og þú.“

Mikil viðbrögð urðu við þessum orðum Gunnars Braga. Steingrímur svaraði: „Auðvitað er hæstvirtur ráðherra orðin þvílíkur ómerkingur í þingsölum.“

Kristján L. Möller, þingmaður Samfylkingarinnar og meðlimur í forsætisnefnd Alþingis, var næstur í pontu á eftir Steingrími. Hann sagði að ef hann sæti i stóli forseta myndi hann enda þingfund. Hann sagði orð Gunnars Braga „algjörlega fyrir neðan virðingu Alþingis“.

Eftir þónokkra umræðu um orð utanríkisráðherra, steig hann sjálfur í pontu og bað Steingrím afsökunar.

Steingrímur svaraði um hæl: „Friðarins vegna tek ég það gilt, okkur getur öllum orðið á í hita leiksins, en ég tek engu að síður undir tillögur um að við slítum þessum fundi og förum heim að sofa.“

Ragnheiður styður ekki tillöguna 

Annar fréttnæmur atburður á þingi í gær. Þingflokksformaður Sjálfstæðisflokksins, Ragnheiður Ríkharðsdóttir, sagðist ekki ætla að styðja þingsályktunartillögu Gunnars Braga.

„Nei, ég mun ekki styðja þessa tillögu óbreytta,“ sagði Ragnheiður meðal annars á þinginu í gær.

„Það er í mínum huga alveg sama hversu erfitt verkefnið er eða þungt, þá þarf að útkljá það með einhverjum hætti og í mínum huga á ekki að útkljá þetta deiluefni nema af þjóðinni sjálfri og það í kosningum sem Alþingi boðar til.“