Erkifjendur mætast í úrslitunum

Bandaríkin og Kanada lentu ekki í teljandi vandræðum með andstæðinga sína í undanúrslitum íshokkíkeppni kvenna á Vetrarólympíuleikunum í Sotsjí.

Bandaríkin fór illa með Svía í fyrri leik dagsins, 6-1, og áttu 70 skot í leiknum en Svíar aðeins níu.

Þær bandarísku eiga þó erfiðari leik í vændum á fimmtudag en þá mæta þær Kanada í úrslitaleiknum. Kanada, sem hefur unnið gull á þremur síðustu leikum, vann Sviss í hinum undanúrslitaleiknum, 3-1.

Þetta eru án nokkurs vafa tvö bestu lið heimsins í dag og má búast við gríðarlega spennandi viðureign um gullið. Leikurinn hefst klukkan 17.00 á fimmtudag.