Sakaður um að svíkja fé af presti og flóttamanni

Aðalmeðferð í máli ákæruvaldsins gegn Sigurði Kárasyni hófst í morgun í Héraðsdómi Reykjavíkur en honum er gefið að sök að hafa svikið út 117 milljónir króna af 16 manns. Samkvæmt hádegisfréttum RÚV var Sigurður ekki mættur fyrir dóm í morgun.

Sigurður var dæmdur í 20 mánaða fangelsi árið 1999 fyrir að svíkja um 30 milljónir af ekkju þekkts athafnamanns en konan var með Alzheimer. Sigurður þurfti ekki að sitja allan dóminn af sér þar sem forseti Íslands náðaði hann.

Meðal þeirra sem báru vitni í morgun var kona sem kom hingað til lands sem flóttamaður árið 1990 að því er fram kom í frétt RÚV. Konan kann litla íslensku og kynntist Sigurði þar sem hún vann við afgreiðslu í búð þar sem hann var viðskiptavinur. Hún lét hann fá 500 þúsund krónur þegar hann bauðst til að útvega henni gjaldeyri en hún ætlaði að fara með fjölskyldu sinni til Kanada. Peninginn sá hún ekki aftur.

Sóknarprestur í Reykjavík bar einnig vitni í morgun en hann lánaði Sigurði níu og hálfa milljón. Sigurður hafði beðið prestinn um hjálp þar sem hann væri í erfiðleikum með gjaldeyrissamning. Presturinn lánaði honum í nokkrum greiðslum og sagði presturinn að hann hefði verið kominn inn í ferli sem var erfitt að standast sálfræðilega.