Náðaði svikahrappurinn

Sigurður Kárason, mikilvirkur svikahrappur, var ekki viðstaddur þegar þingfesting í máli hans fór fram í Héraðsdómi Reykjavíkur klukkan 11 í morgun. Samkvæmt ákæru sveik hann milljónir af 16 manns. Það vekur sérstaka athygli að Sigurður var náðaður á sínum tíma fyrir sambærilegt brot en þá hlaut hann 20 mánaða fangelsisdóm.

Sigurður hefur komið víða við og verið lengi að við vafasama iðju sína. Árið 1999 hlaut hann þungan dóm, hann var dæmdur í 20 mánaða fangelsi. Ólafur Ragnar Grímsson, forseti Íslands, náðaði Sigurð og hefur það nú verið rifjað upp og vakið nokkra furðu manna á meðal. Sigurður G. Tómasson fjölmiðlamaður spyr til dæmis á Facebooksíðu sinni hvort þetta geti verið satt? "Sigurður Kárason, sem á sínum tíma var dæmdur í 20 mánaða fangelsi fyrir að svíkja stórfé, 30 milljónir þá, út úr ekkju með Alzheimer. Forsetinn náðaði hann þá. Af hverju?" Margir eru til að leggja orð í belg um málið á síðu Sigurðar.

Um tíma virtist sem öll spjót beindust að forsetanum vegna þessarar náðunar sem eftir á að hyggja getur varla talist gáfuleg. En, óvænt hefur Björn Bjarnason, fyrrverandi dómsmálaráðherra, risið upp til varnar Ólafi Ragnari á bloggsíðu sinni.

Björn skammar fréttastofu Ríkisins fyrir að ala á ómaklegum misskilningi í hans garð í frétt sinni og bendir á að formlega áriti forsetinn tillögu um náðun en taki ekki efnislega afstöðu til hennar, og ekki heldur ráðherrann sem leggur tillögu fyrir forsetann -- ráðherrann er bundinn af niðurstöðu þriggja manna náðunarnefndar, að sögn Björns sem bætir í og segir:

"Hafi svikahrappurinn verið náðaður á sínum tíma eins og fréttastofan fullyrðir gefur það ekki rétta mynd af málinu að bendla náðunina við forseta Íslands, hann er ábyrgðarlaus af stjórnarathöfnum, þar á meðal náðunum. Þessi þáttur fréttarinnar ber vott um vanþekkingu, léleg vinnubrögð eða vísvitandi tilraun til að gera undirritun forseta Íslands tortryggilega."

Formaður nefndarinnar er Ragnheiður Bragadóttur, prófessor, en aðrir sem sæti eiga í nefndinni eru Sigurður Guðmundsson læknir og Fanney Óskarsdóttir, lögfræðingur í innanríkisráðuneytinu. Ragnheiður var í morgun tímabundin og gat ekki sett fréttastofu nánar inn í hvað liggur til grundvallar niðurstöðu um náðun.