Kefjast þess að lögreglan afhendi öll gögn í Gálgahraunsmálinu

Sakborningar í Gálgahraunsmálinu hafa í tilefni af nýgengnum úrskurði úrskurðarnefndar um upplýsingamál sent lögreglustjóranum á Höfuðborgarsvæðinu bréf þar sem krafist er upplýsinga um hvort tekin hafi verið saman skýrsla vegna lögregluaðgerðanna sem fram fóru í Gálgahrauni hinn 21. október 2013.

Níumenningarnir sem ákærðir voru vegna mótmælanna í Gálgahrauni voru fyrr í þessum mánuði dæmdir til að greiða 100 þúsund krónur í sekt, á mann, innan fjögurra vikna. Ella fari þeir í fangelsi í átta daga. Þar að auki var þeim gert að greiða 150 þúsund krónur í sakarkostnað.

„Hér er átt við hvort til sé einhver samantekt um undirbúning, skipulagningu eða framkvæmd gríðarlega umfangsmikilla lögregluaðgerða í umrætt sinn gagnvart þeim eða öðrum friðsömum mótmælendum,“ segir í tilkynningu frá níumenningunum.

Það kemur einnig fram að fyrst hafi fengist upplýst að ekki færri en sextíu lögreglumenn munu hafa verið á vettvangi í Gálgahrauni þegar mótmælin fóru fram.

Í bréfi til lögreglustjóra er þess krafist að lögreglan afhendi öll gögn sem hún hafi undir höndum í viðkomandi máli, en þeirri kröfu hefur áður verið alfarið hafnað með vísan til undanþáguákvæðis upplýsingalaga.

Þá er þess krafist í bréfi til lögreglustjóra að því verði svarað undanbragðalaust hvort símar þeirra eða lögmanna þeirra hafi verið hleraðir í tengslum við umrædd mótmæli og lögregluaðgerðir.