Enginn Íslendingur haft eins mikil áhrif

Karl Sigurbjörnsson, fyrrverandi biskup, er höfundur nýrrar myndskreyttrar bókar um lífshlaup Hallgríms Péturssonar sem forlagið Ugla gefur út.

„Ég var í undirbúningshópi hjá Hallgrímskirkju vegna afmælisárs Hallgríms og það vantaði stutt og laggott yfirlit yfir ævi hans, kveðskap og áhrif á menningu okkar og trú.

Það var gaman að vinna að því og velja myndir sem varpa ljósi á sögu hans,“ segir Karl og bætir við að efnið sé komið út, annars vegar sem bæklingur á íslensku, ensku, þýsku og dönsku og í bókarformi.

Bókin er aðeins 32 blaðsíður í A5-broti. Var ekki erfitt að koma hinni mögnuðu sögu sálmaskáldsins fyrir á svo fáum síðum?

„Jú, það þurfti ansi mikið að velja og hafna því þarna er bara stiklað á því stærsta.

Þetta er mögnuð lífssaga og ég fullyrði að enginn Íslendingur hefur haft önnur eins áhrif á eina þjóð eins og Hallgrímur Pétursson.“