Leið eins og væri verið að troða upp í hann illa lyktandi lopasokk

Tillaga Einar K. Guðfinnsonar, forseta Alþingis, um kvöldfund var samþykkt á Alþingi áðan með 34 atkvæðum gegn 21.

Óskað var eftir nafnakalli þegar greidd voru atkvæði um tillöguna og sköpuðust lifandi umræður á þingi í kjölfarið.

Ragnheiður Ríkharðsdóttir, þingmaður Sjálfstæðisflokksins, taldi nafnkallið eitt það hlálegasta hef gerst hefði á Alþingi í lengra tíma, enda óvanalegt að óskað sé eftir nafnakalli um lengd þingfundar.

Össur Skarphéðinsson, fyrrverandi utanríkisráðherra, sagðist fyrr liggja dauður en að hleypa þingsályktunartillögu Gunnars Braga Sveinssonar, núverandi utanríkisráðherra í gegnum þingið.

Katrín Jakobsdóttir, fyrrverandi menntamálaráðherra, sagði málsmeðferðina ómálefnlega og Katrín Júlíusdóttir gagnrýndi ríkisstjórnina fyrir að leggja engin mál fyrir þingið en ætla nú að keyra í gegn viðræðuslit við Evrópusambandið.

Guðmundi Steingrímssyni, formanni Bjartrar Framtíðar, leið hins vegar að eigin sögn eins og einhver væri að troða upp í hann illa lyktandi lopasokk.