Austfirðingar óhressir með minni mokstur

Austfirðingar eru afar óhressir með þá ákvörðun Vegagerðarinnar að fækka snjómokstursdögum á Möðrudalsöræfum á milli Mývatns  og Egilsstaða og til Vopnafjarðar, eins og til stendur eftir helgi.

Þeir líkja þessu við að þessi landsfjórðungur einangrist þá daga, sem vegir eru ekki ruddir. Vegagerðin gefur þá skýringu á þessu að víða á þessum leiðum séu komin djúp snjógöng, sem erfitt sé að halda opnum, og við hvern mokstur dýpki þau enn, þannig að enn erfiðara verði að opna á ný.

Þá er gert ráð fyrir að þessum vegum verði lokað yfir nóttina því þeir geti lokast á skammri stundu, ef vind hreyfir og skafa tekur í snjógöngin.

Strætó hefur breytt áæltun sinni vegna þessa og ekur vagn 56 aðeins á þriðjudögum og föstudögum, eða mokstursdaga Vegagerðarinnar. Vegagerðin íhugar einnig að grípa til takmarkana á Oddsskarði og Fjarðarheiði af sömu sökum.