Bækur í stað bolta á Laugardalsvelli

„Það var heljarinnar verk að færa bókamarkaðinn úr Perlunni,“ segir Bryndís Loftsdóttir, framkvæmdastjóri bókamarkaðarins.

Flutningurinn sé þó vel þess virði, meira pláss sé fyrir bækur og fólk. Hálfs kílómetra göngutúr sé meðfram öllum bókaborðunum.

Bryndís segir þó marga villast og fara í Laugardalshöllina. „Það er ekki nema von. Það hefur aldrei neitt þessu líkt verið haldið hér undir stúkunni við fótboltavöllinn.“

Bókamarkaðurinn verður á Laugardalsvellinum til 9. mars og er opinn daglega frá klukkan tíu til sex.