Lífeyrisþegar láta óánægju bitna á lífeyrissjóðum

Kjaranefnd Félags eldri borgara í Reykjavík telur að afnema eigi skerðingu tryggingabóta aldraðra hjá TR vegna greiðslna úr lífeyrissjóði. Í ályktun nefndarinnar sem samþykkt var á fundi í dag, minnir hún á að við stofnun lífeyrissjóðanna var gert ráð fyrir því að þeir yrðu viðbót við almannatryggingar.

Að ekki hafi verið reiknað með því að greiðslur úr lífeyrissjóðum myndu skerða lífeyri aldraðra frá almannatryggingum.

„Í dag er skerðingin svo mikil að óánægjan með hana ógnar lífeyrissjóðunum og almannatryggingunum. Enda þótt ákvörðun um skerðingu tryggingabóta aldraðra hafi verið tekin af Alþingi og stjórnvöldum láta margir lífeyrisþegar óánægju sína bitna á lífeyrissjóðunum,“ segir í ályktuninni.

Þá segir að einhleypur lífeyrisþegi, sem hafi 70 þúsund krónur í lífeyri frá lífeyrissjóði á mánuði, sæti 63 þúsund króna skerðingu á mánuði hjá Tryggingastofnun.

Sá sem aldrei hefur borgað í lífeyrissjóð fái svipaða upphæð greidda frá almannatryggingum og sjóðþeginn fær samanlagt úr lífeyrissjóði og almannatryggingum.

„Þetta er mikið ranglæti og verður að leiðrétta. Kjaranefnd skorar á ríkisstjórn og Alþingi að afnema þessar skerðingar. Ef það þykir of kostnaðarsamt að afnema skerðingarnar í einum áfanga má gera það í 2-3 áföngum.“