Sex ungmenna minnst í Reykjanesbæ

Minningarlundur um ungt fólk var vígður í Reykjanesbæ í gær og var sex ungmenna, sem létust fyrir aldur fram, minnst. Steinn var afhjúpaður í lundinum þar sem búið er að setja á myndir og nöfn þeirra sem minnst var.

Foreldrum þeirra sex ungmenna sem nú var minnst var boðið að vera viðstaddir og voru þeir jafnframt hvattir til að taka með sér nánustu aðstandendur og vini hinna látnu.

Áður en formleg vígsla lundarins fór fram flutti dúettinn Heiður sálminn Kveðju eftir Bubba Morthens og kennarar Tónlistaskóla Reykjanesbæjar frumfluttu sálm eftir Indriða Jósafatsson. Hann samdi sálminn til minningar um 15 ára dreng sem lést í bílslysi.

Árni Sigfússon, Bæjarstjóri, og Thelma Rún Matthíasdóttir frá Ungmennaráði fluttu ávörp.

Samkvæmt tilkynningu frá Reykjanesbæ sagði Erla Guðmundsdóttir meðal annars við vígslun hve mikilvægt það væri að minnast þeirra sem ekki eru á meðal oss lengur og hve mikilvægt væri að taka á móti sumrinu með hlýju í hjarta. Hún sagðist þakklát fyrir að fá að taka þátt í þessari fallegu athöfn.

Íþrótta- og tómstundasvið Reykjanesbæjar  og Ungmennaráð vilja  koma sérstökum þökkum til foreldra sem samþykktu að útbúa plattana og làta þessa hugmynd verða að veruleika.

Næsta minningarstund verður haldin í september. Ef foreldrar vilja taka þátt í verkefninu og minnast barna sinna sem voru á aldrinum 13 til 25 ára er þau létust og voru frá Reykjanesbæ, er hægt að senda upplýsingar á netfangið it@rnb.is.